Gürcüstan-Azərbaycan münasibətlərində yeni mərhələnin başlanğıcının şahidi olacağıq - AÇIQLAMA
Son illərdə Gürcüstan-Azərbaycan münasibətləri daha da inkişaf etməkdədir. Həm Azərbaycan, həm də Gürcüstan regionda sabitlik və tərəqqi üçün vacib əməkdaşlıq platformaları qurmağa davam edir. İqtisadi, mədəni və siyasi sahələrdə birgə layihələrin genişlənməsi hər iki ölkəyə yeni perspektivlər açır. Bu əlaqələr regionda strateji layihələrin həyata keçirilməsi və beynəlxalq arenada güclənən mövqelər üçün bir təməl rol oynayır.
Bildiyimiz kimi, Gürcüstan Prezidenti Mixeil Kavelaşvili aprelin 15-də Azərbaycana ilk xarici səfərini edib. Səfər çərçivəsində o, dövlət başçısı İlham Əliyev ilə görüşüb. Görüşdə iki ölkə arasında əməkdaşlığın inkişaf etdirilməsi yolları müzakirə edilib. Həmçinin, iqtisadi, mədəni və siyasi sahələrdə əlaqələrin daha da möhkəmləndirilməsi məqsədilə bir sıra məsələlər ətrafında fikir mübadiləsi aparılıb. Bu səfər iki ölkə arasındakı münasibətlərin daha da dərinləşməsinin bir sübutudur.
Mövzu ilə bağlı Crossmedia.az-a açıqlama verən Milli Məclisin deputatı Ceyhun Məmmədov ilk olaraq bildirib ki, bu gün Azərbaycan-Gürcüstan əlaqələri yeni bir mərhələyə daxil olub:
“İki ölkə arasındakı əməkdaşlıq daha da inkişaf edir. Gürcüstan Prezidentinin ilk xarici səfərini Azərbaycana etməsi bu əlaqələrin möhkəmləndiyinin və gücləndiyinin göstəricisidir. Bir müddət bundan əvvəl Antalyada Cənab Prezident İlham Əliyev və Gürcüstan Baş naziri İrakli Kobaxidze görüş keçirib. Tədbirdə cənab Prezident Gürcüstanla əlaqələri yüksək qiymətləndirib. Cənab Prezident vurğulayıb ki, “Bu gün Avropanın təhlükəsizliyini Azərbaycanın və Gürcüstanın iştirakı olmadan təsəvvür etmək qeyri-mümkündür”. Bu da Azərbaycan və Gürcüstanın bölgə proseslərində oynadığı fəal rolu bir daha təsdiqləyir. Yəni, bu gün Azərbaycan bu prosesdə Gürcüstanla birlikdə çox fəal rol oynayır və bu da ölkələrimiz arasında əməkdaşlıq əlaqələrinin daha da inkişaf etdiyini göstərir”.
Deputatın sözlərinə görə, bölgədəki proseslərə əsas mane olan dövlət Ermənistandır:
“Azərbaycanın Gürcüstanla əlaqəli geniş gündəliyi var. Bu gün nəqliyyat, kommunikasiya və enerji təhlükəsizliyi kimi sahələrdə iki ölkə arasında sıx əməkdaşlıq mövcuddur. Azərbaycan hər zaman Gürcüstanı dəstəkləyir, Gürcüstan isə beynəlxalq platformalarda Azərbaycanın maraqlarını müdafiə edir. Onu da qeyd etmək lazımdır ki, hər iki ölkə Avropa İttifaqı və digər qurumların ikili standartları ilə üzləşməsinə baxmayaraq, ortaq məqsədlərinə doğru birgə addımlayır. Biz bunun daha da sürətlənəcəyinin və inkişaf edəcəyinin şahidi olacağıq. Bu istiqamətdə bütün tərəflərin üzərinə böyük bir məsuliyyət düşür. Hesab edirəm ki, bu səfərdən sonra əlaqələrimizdə yeni istiqamət və mərhələnin başlanğıcının şahidi olacağıq.
Əlaqələrimiz daha da güclənəcək, mükəmməlləşəcək və inkişaf edəcək. Yeni layihələr, əməkdaşlıq və perspektivlər bizim gözümüzün qarşısında formalaşacaq. Bu da bir mənalı şəkildə prosesin inkişafına öz ciddi töhfəsini verəcək”,- deyə C.Məmmədov fikrini yekunlaşdırıb.
Nəzrin Salmanova
12:21 17.04.2025
Oxunuş sayı: 7130
