FED sədri Pauelldən iqtisadiyyata dair kritik açıqlamalar
ABŞ Federal Ehtiyat Sisteminin (FED) sədri Cerom Pauell bir sıra mühüm iqtisadi açıqlamalarla çıxış edib. Onun sözlərinə görə, hazırda tətbiq olunan rüsumlar inflyasiyaya gözlənildiyindən daha güclü və uzunmüddətli təsir göstərir. Pauell bildirib ki, bu rüsumlar indiyə qədər proqnozlaşdırılandan daha yüksək olub və nəticədə həm inflyasiyanın artması, həm də iqtisadi artımın yavaşlaması müşahidə olunur.
Crossmedia.az xəbər verir ki, bu barədə xarici media yazıb.
Sədr vurğulayıb ki, FED faiz dərəcələrini azaltmağa tələsməyəcək: "Daha çox əminlik gözləməliyik". Pauell eyni zamanda qeyd edib ki, artan qeyri-müəyyənliklər və eniş risklərinə baxmayaraq ABŞ iqtisadiyyatı sabitdir.
Əsas mesajlar isə bunlardır:
Rüsumların təsiri gözlənildiyindən daha yüksək və davamlı ola bilər;
Yüksək rüsumlar inflyasiyanın artmasına və iqtisadi artımın zəifləməsinə gətirib çıxarır;
Faiz endirimləri üçün hələ vaxt deyil;
İlin sonuna qədər siyasət FED-in hədəflərindən uzaqlaşa bilər;
Gələn il yumşaldıcı siyasətə qayıdılması mümkündür;
Rüsumlar hətta FED-in yüksək proqnozlarından da üstündür.
Belə ki, Pauell avtomobil sektoruna da toxunaraq bildirib ki, avtomobil şirkətlərinin tədarük zəncirləri illər ərzində pozula bilər. Bu isə inflyasiyanın uzunmüddətli yüksəlişinə səbəb ola bilər.
Həmçinin, FED sədri faiz artımının mümkünlüyünü istisna etməyib və bildirib ki, yaxın gələcəkdə çətin qərarların verilməsi lazım gələ bilər.
Məlumata görə, FED qlobal maliyyə bazarlarında dollar çatışmazlığı yaranarsa, digər mərkəzi banklara dəstək verməyə hazır olduğunu açıqlayıb. Eyni zamanda Pauell ABŞ-nin borc artımının "dayanıqsız trayektoriyada" olduğunu da qeyd edib.
Bildirək ki, Pauell kriptovalyutanın artan populyarlığını vurğulayıb, stabilkoinlər üçün hüquqi bazanın yaradılmasının vacibliyini qeyd edib. Onun sözlərinə görə, bank qaydaları kriptovalyutalarla bağlı yumşaldıla bilər.
Sədr, həmçinin, süni intellektin iqtisadiyyatda "oyun dəyişdirici" təsir yarada biləcəyini söyləyib: “İşlərin necə dəyişəcəyini demək çətindir, lakin təsiri böyük olacaq”.
Fatimə Məmmədova
09:45 17.04.2025
Oxunuş sayı: 5507
