ABŞ nümayəndəsi Rusiyaya Ukraynanın bəzi bölgələrinin verilməsini təklif edib
ABŞ Prezidenti Donald Trampın xüsusi nümayəndəsi Stiv Vitkoff ona bildirib ki, Rusiyanın işğal etdiyi dörd Ukrayna vilayətinin Moskvaya verilməsi atəşkəsin əldə olunması üçün ən qısa yol ola bilər.
Crossmedia.az xəbər verir ki, bu barədə “The Kyiv Independent” qəzeti məlumat yayıb.
Məlumata görə, Vitkoff bu təklifi Trampa Vaşinqtonda rusiyalı nümayəndə Kirill Dmitriyevlə görüşdən sonra təqdim edib. Daha sonra o, Sankt-Peterburqda Rusiya Prezidenti Vladimir Putinlə Ukraynadakı müharibənin mümkün həlli yollarını müzakirə edib.
Bildirilib ki, Tramp administrasiyası daxilində Rusiya-Ukrayna müharibəsinin çıxılmaz vəziyyətindən çıxış yolları ilə bağlı fikir ayrılığı var. Vitkoff və ABŞ-nin digər xüsusi nümayəndəsi Kit Kelloq bu məsələdə fərqli mövqelər nümayiş etdirir. Kelloq Ukraynanın işğal olunmuş əraziləri birtərəfli şəkildə Rusiyaya verməyə razı olmayacağını bildirib.
Qeyd edək ki, mart ayında Vitkoff mühafizəkar siyasi şərhçi Taker Karlsona verdiyi müsahibədə Ukraynanın işğal olunmuş bölgələri ilə bağlı Rusiya təbliğatını səsləndirib. O iddia edib ki, həmin bölgələrdə əhali referendumda iştirak edib və Rusiyaya birləşmək istədiyini bildirib.
Bu müsahibədən sonra Respublikaçı donor Erik Levin Respublikaçılar arasında yaydığı məktubda Vitkoffu Putinə simpatiya göstərməkdə ittiham edib və onun yerinə Dövlət katibi Marko Rubionun təyin edilməsini təklif edib.
Bəzi Respublikaçı konqresmenlər də Vitkoffun mövqeyindən narahatlıq bildirərək Rubio və Milli Təhlükəsizlik üzrə müşavir Mayk Valtza şikayətlərini çatdırıblar.
Bildirək ki, Rusiya 2022-ci ilin sentyabrında işğal olunmuş Luqansk, Donetsk, Zaporojye və Xerson vilayətlərində silah gücü ilə saxta “referendumlar” təşkil edib. Bu proses beynəlxalq hüquqa və Ukrayna qanunvericiliyinə zidd hesab olunur, nəticələri yalnız Rusiya və Şimali Koreya tərəfindən tanınıb.
Həmçinin xatırladaq ki, Rusiya 2014-cü ildə Krımı, 2022-ci ildə isə dörd vilayəti qanunsuz şəkildə ilhaq etdiyini elan edib. Tramp administrasiyası isə Ukraynanın 2014-cü il öncəsi sərhədlərinə qayıtmasını “real olmayan” bir hədəf kimi dəyərləndirib.
Fatimə Məmmədova
12:54 13.04.2025
Oxunuş sayı: 9380
