Özbəkistanda "Mərkəzi Asiya – Avropa İttifaqı" sammiti keçirilir
Bu gün Özbəkistanda "Mərkəzi Asiya – Avropa İttifaqı" sammiti işinə başlayıb. Region ölkələrinin liderləri və Avropa Komissiyasının rəhbərinin iştirakı ilə keçirilən tədbirdə iqtisadi əməkdaşlıq, nəqliyyat marşrutlarının inkişafı, bərpa olunan enerji və strateji resursların işlənməsi kimi mövzular müzakirə olunur.
Crossmedia.az xəbər verir ki, bu barədə xarici KİV məlumat yayıb.
Türkmənistan Prezidenti Sərdar Berdımuhammedov çıxışında Avropa İttifaqı ilə nəqliyyat sahəsində əməkdaşlığın gücləndirilməsi üçün Transxəzər Beynəlxalq Nəqliyyat Marşrutunun vacibliyini qeyd edib.
Həmçinin, Qırğızıstan Prezidenti Sadır Japarov ölkəsinin Aİ ilə ticarət dövriyyəsinin son dörd ildə 2,4 dəfə artdığını bildirib. O, Avropa şirkətlərini 1860 MVt gücündə Kambarata-1 Su Elektrik Stansiyasının tikintisinə və 400 MVt-dan çox gücə malik günəş enerjisi layihələrinə investisiya qoymağa çağırıb.
Qazaxıstan Aİ-yə "yaşıl enerji" ixrac edəcək
Qazaxıstan Prezidenti Kasım-Jomart Tokayev Qazaxıstanın Özbəkistan və Azərbaycanla birlikdə Aİ-yə "yaşıl" enerjinin ötürülməsi layihəsinə başladığını açıqlayıb.
Qeyd edək ki, o, ölkəsinin Aİ-nin neft tələbatının 13%-ni təmin etdiyini və 2027-ci ilə qədər Transxəzər dəhlizi ilə konteyner daşımalarını 10 milyon tona çatdırmağı hədəflədiyini deyib.
Fatimə Məmmədova
17:15 04.04.2025
Oxunuş sayı: 7297
