Çin ABŞ-nin Venesuela siyasətinə etiraz etdi: “Sanksiyalar qanunsuzdur”
Pekin, 25 mart – Çin ABŞ-nin Venesueladan neft və qaz alan ölkələrə qarşı ticarət tarifləri tətbiq edərək cəzalandırmaq niyyətinə sərt reaksiya verib. Çin Xarici İşlər Nazirliyinin sözçüsü Quo Ciaokun bu addımı tənqid edərək Vaşinqtonu Venesuelanın daxili işlərinə qarışmamağa çağırıb.
“ABŞ Venesuelanın daxili işlərinə qarışmağı dayandırmalı və Venesuelaya qarşı tətbiq etdiyi qanunsuz, birtərəfli sanksiyaları ləğv etməlidir”, – deyə Ciaokun bəyan edib.
Pekin bu cür iqtisadi təzyiqlərin beynəlxalq hüquqa və ədalət prinsiplərinə zidd olduğunu bildirib. Çin rəsmiləri Vaşinqtonun bu cür addımlarının regionda sabitliyi poza biləcəyindən narahat olduqlarını da vurğulayıb.
Qeyd edək ki, ABŞ administrasiyası son vaxtlar Venesueladan enerji alan bəzi ölkələrə qarşı ticarət tarifləri tətbiq etmək niyyətində olduğunu açıqlamışdı.
22:45 25.03.2025
Oxunuş sayı: 5735
