Xarici xəbərlər

Bu ölkələr Ottava konvensiyasından çıxır

Crossmedia.az xarici mediaya əsasən bildirir ki, Estoniya, Latviya, Litva və Polşanın müdafiə nazirləri Rusiyanın hərbi təhdidlərinə görə 1997-ci il Ottava Konvensiyasından çıxmağı təklif ediblər.

Piyada əleyhinə minaların istifadəsini, istehsalını və ötürülməsini qadağan edən bu müqavilə 160-dan çox ölkə tərəfindən ratifikasiya edilib. Lakin Rusiya sazişə qoşulmayıb və onun Ukraynaya genişmiqyaslı işğalı müharibədən əziyyət çəkən ölkəni dünyanın ən çox minalanmış ərazilərindən birinə çevirib.

Baltikyanı ölkələr və Polşanın birgə bəyanatında vurğulanıb ki, Rusiya və Belarusla həmsərhəd olan NATO ölkələrinə qarşı hərbi təhdidlər artıb. Buna görə də, alyansın şərq cinahını gücləndirmək üçün daha çevik və geniş müdafiə imkanlarına ehtiyac var. Sazişdən çıxma niyyətinə baxmayaraq, bu ölkələr humanitar qanunlara və mülki şəxslərin müdafiəsinə riayət edəcəklərini bildiriblər.

Rusiyanın 2022-ci ildə Ukraynaya tammiqyaslı müdaxiləsindən sonra Estoniya, Litva və Polşa müdafiə xərclərini artıraraq, ABŞ prezidenti Donald Trampın hədəfi olan ÜDM-in 5 faizini bu sahəyə ayırmağı öhdələrinə götürüblər. Hazırda NATO üzrə bu göstərici 2 faizdir.

Zəhra Ağayeva

🖨 Çap et

14:11 18.03.2025

Oxunuş sayı: 1372