Hyuston müsəlmanları bir yerə toplanıb
ABŞ-nin Texas ştatının Hyuston şəhərində müsəlman icması Ramazan ayı münasibətilə bir yerə toplanıb.
Crossmedia.az xəbər verir ki, tədbir Hyuston meriyası ilə Qardaş Şəhərlər Assosiasiyalarının əməkdaşlığı çərçivəsində “Bayou City” Tədbir Mərkəzində baş tutub. 2000-dən çox adamın qatıldığı tədbirdə Hyuston şəhər meri Con Vitmayer (John Whitmire), icma rəhbərləri, ictimai-siyasi xadimlər, iş adamları, diplomatlar, yüksək rütbəli dövlət məmurları iştirak ediblər.
Azərbaycan icmasını tədbirdə Hyuston-Bakı Qardaşlaşmış Şəhərlər Assosiasiyası təmsil edib. Assosiasiyanın rəhbəri İradə Axundova da iftar süfrəsinə qatılanlar sırasında yer alıb.
Hyuston meri tədbir iştirakçısı qardaşlaşmış şəhər assosiasiyalarına bəyannamə təqdim edib. Bəyannamədə qeyd olunub ki, Hyustonun multikulturalizm modelinin əsası qarşılıqlı anlaşma və əməkdaşlıq çərçivəsində sülhün bərqərar olmasıdır. Bu baxımdan tədbirin sivilizasiyalarası dialoqun inkişafına mühüm töhfələr verəcəyi diqqətə çatdırılıb.
Sonra Texas qubernatoru Qreq Abbottun Amerika müsəlmanlarına videomesaj vasitəsilə təbriki yayımlanıb.
Çıxışçılar tədbirin dinlərarası harmoniya baxımından əhəmiyyətini vurğulayaraq dözümlülük və birliyi təcəssüm etdirdiyini bildiriblər.
Mer Con Vitmayer və konqresmen Al Qrin tədbirin təşkilatçılarına təşəkkür sertifikatları təqdim edib. Qonaqlar tədbirin təşkilində əməyi keçən hər kəsə minnətdarlıqlarını bildiriblər.
13:10 15.03.2025
Oxunuş sayı: 575
