Kreml daxilində yeni siyasi fraksiyalar formalaşır
Rusiyada "Xüsusi Hərbi Əməliyyat"ın (XHƏ) başlamasından sonra Kremlin siyasi elitasında ciddi dəyişikliklər müşahidə olunur. Son məlumatlara görə, hakimiyyət daxilində üç əsas siyasi qrup formalaşıb: Çinyönümlü qrup, Amerikapərəst qrup və Prezident qrupu. Hər üç fraksiya Rusiya siyasətinin daxili və xarici istiqamətlərini müəyyənləşdirmək üçün mübarizə aparır.
Çinyönümlü qrup: Şərqə inteqrasiya və Qərbdən ayrılma siyasəti
Bu fraksiya Çinin iqtisadi gücündən istifadə etməklə Rusiyanın Qərblə münasibətlərini minimuma endirməyi hədəfləyir. Enerji, maliyyə, müdafiə sənayesi və nüvə enerjisi sahələrində əməkdaşlığı prioritet hesab edən bu qrupda İqor Seçin (“Rosneft”), Viktor Zubkov (“Qazprom”), Sergey Şoyqu, Nikolay Patruşev və Mixail Mişustin kimi siyasi və biznes dairələrinin nüfuzlu fiqurları yer alır.
Amerikapərəst qrup: Qərblə münasibətlərin bərpası
Bu fraksiya Rusiya və ABŞ arasında münasibətlərin müəyyən səviyyədə bərpasına çalışır. Onların əsas məqsədi Qərbin tətbiq etdiyi sanksiyaların yumşaldılması və Rusiya iqtisadiyyatının qlobal sistemə qismən inteqrasiyasıdır. Qrupa Sergey Narışkin, Roman Abramoviç, Mixail Fridman və mərhum Vladimir Koqanın biznes dairəsi daxildir.
Xatırladaq ki, Rusiya Təhlükəsizlik Şurasının sədr müavini, keçmiş prezident və baş nazir Dmitri Medvedev sərt anti-Qərb mövqeyinə baxmayaraq, məhz bu fraksiyaya aid edilir.
Prezident qrupu: Müstəqillik və balans siyasəti
Prezident qrupu nə Qərbə, nə də Çinə tam yaxınlaşmanı dəstəkləyir və Rusiyanın strateji müstəqilliyini qorumağı prioritet hesab edir. Fraksiyanın əsas simaları arasında Sergey Çemezov, Denis Manturov, Vyaçeslav Volodin, Kirill Dmitriev və Viktor Zolotov yer alır.
Qeyd edək ki, Rusiya prezidentinin müşaviri və Putinin potensial varisi hesab edilən Aleksey Dyumin də bu qrupa daxildir. O, Moskvanın nə Qərbə, nə də Çinə tam yaxınlaşmalı olduğunu düşünərək, balans siyasətinin əsas xarici prioritet kimi qalmalı olduğunu vurğulayır.
Gələcək siyasi kursu kim müəyyən edəcək?
Rusiya siyasi elitasında formalaşan bu üç qrup arasında güc mübarizəsi Kremlin gələcək daxili və xarici siyasət kursunun hansı istiqamətdə davam edəcəyini müəyyən edəcək. Hazırda siyasi analitiklər bu fraksiyalar arasındakı münasibətlərin yaxın perspektivdə Rusiyanın geosiyasi mövqeyinə ciddi təsir göstərəcəyini bildirirlər.
22:10 12.03.2025
Oxunuş sayı: 650
