Ukrayna müvəqqəti atəşkəsə razıdır - sülhə ümid varmı?
ABŞ və Ukrayna nümayəndə heyətləri Səudiyyə Ərəbistanının Ciddə şəhərində danışıqlar aparıb.
Crossmedia.az xarici KİV-ə istinadən xəbər verir ki, ABŞ dövlət katibi Marko Rubionun başçılıq etdiyi nümayəndə heyəti ilə Ukrayna tərəfi arasında görüş 9 saat davam edib.
Danışıqlardan sonra Ağ Ev açıqlama verərək, Ukraynanın 30 günlük müvəqqəti atəşkəsə hazır olduğunu bəyan edib.
Sülh danışıqları və hərbi yardım məsələsi müzakirə olunub
ABŞ Dövlət Departamentinin məlumatına görə, görüş “konstruktiv” keçib. Dövlət katibi Marko Rubio Ukraynanın atəşkəs təklifini alqışlayaraq, bunu “münaqişəyə son qoymaq üçün bir növ güzəşt” adlandırıb.
O, Rusiyanın Ukraynanın bütün ərazisini ələ keçirməsinin mümkünsüz olduğunu vurğulasa da, işğal olunmuş ərazilərin geri qaytarılmasının çətinliyini də qeyd edib.
Bundan əlavə, ABŞ və Ukrayna hərbi yardım məsələsini də müzakirə edib. Rubionun sözlərinə görə, Vaşinqton Kiyevə dəstəyini davam etdirmək üçün yeni addımlar atacaq və təhlükəsizlik məsələlərində əməkdaşlığı genişləndirmək niyyətindədir.
Aybəniz Səfərova
22:35 11.03.2025
Oxunuş sayı: 1584
