Ərdoğan: “Razılaşmanın qalibi Suriya olacaq”
Türkiyə Prezidenti Rəcəb Tayyib Ərdoğan Beştepedə təşkil edilən "Fələstinlilərlə qardaşlıq iftar" proqramında çıxış edib.
Crossmedia.az türk mətbuatına istinadən xəbər verir ki, o, Suriya-SDQ razılaşmasına toxunaraq, Suriyanın ərazi bütövlüyünün qorunmasının vacibliyini vurğulayıb.
"Biz Suriyanın ərazi bütövlüyünə, unitar quruluşunun qorunub saxlanmasına, birlik və həmrəyliyinin gücləndirilməsinə böyük əhəmiyyət veririk", – deyə Ərdoğan bildirib.
Fələstinə dəstək mesajı
Ərdoğan çıxışında həmçinin Fələstin xalqına dəstəyini ifadə edib. O, müqəddəs Ramazan ayı münasibətilə Qəzza, Qüds və İordan çayının qərb sahilində yaşayan fələstinlilərə salamlarını çatdırıb:
“Fələstinin igid oğullarını, xüsusilə Qəzza, Qüds və İordan çayının qərb sahilindəki qardaşlarımızı öz adımdan və millətim adından hörmətlə salamlayıram”, – deyə o qeyd edib.
Şəhidlərə ehtiram
Ərdoğan Fələstin uğrunda canlarından keçənlərə rəhmət diləyib və şəhidlərin mübarizəsinə hörmətlə yanaşdıqlarını vurğulayıb:
"Allah yolunda öldürülənlərə ölülər deməyin, onlar diridirlər, lakin siz bilmirsiniz", – deyə o Qurani-Kərimdən sitat gətirib.
Türkiyə Prezidenti həmçinin vurğulayıb ki, Qəzzada və İordan çayının qərb sahilində mübarizə aparan fələstinlilərin mücadiləsi heyranlıqla izlənir və Türkiyə hər zaman onların yanında olacaq.
"Fələstinli uşaqların ağrısını hiss edirik"
Prezident çıxışında Qəzzada yaşanan humanitar böhrana və mülki əhalinin, xüsusilə də uşaqların çəkdiyi əziyyətlərə toxunub. O, bu vəziyyətin bütün İslam dünyasını dərindən üzdüyünü qeyd edərək, “ürəkləri yaralı uşaqların ağrısını hiss etdiyini” bildirib.
Türkiyənin dəstəyi davam edəcək
Ərdoğan Fələstinə həm siyasi, həm də humanitar dəstəyin davam edəcəyini vurğulayıb.
O, Ramazan ayının həm Türkiyə, həm də İslam dünyası üçün sülh və bərəkət gətirməsini arzulayıb.
Aybəniz Səfərova
22:26 11.03.2025
Oxunuş sayı: 1644
