Qəzzada humanitar böhran dərinləşir: Ərzaq qiymətləri sürətlə artır
İsrail və HƏMAS arasında yanvarın 19-da qüvvəyə minən atəşkəsin birinci mərhələsi başa çatıb. Lakin ikinci mərhələyə keçid baş tutmayıb və İsrail Qəzzaya humanitar yardımın daxil olmasını dayandırıb. Bu qərar bölgədə ərzaq qiymətlərinin kəskin bahalaşmasına və humanitar böhranın daha da dərinləşməsinə səbəb olub.
Crossmedia.az xarici KİV-ə istinadən xəbər verir ki, 15 aydır İsrailin hücumları altında yaşayan və məhdud imkanlarla qida və suya çıxış əldə edən qəzzalılar yenidən ağır şərtlərlə üzləşiblər.
Yerli mənbələrin verdiyi məlumata görə, unun bir kisəsinin qiyməti 200-300 dollar arasında dəyişir. Yardım axınının dayanması səbəbindən xüsusilə çoxuşaqlı ailələr qida çatışmazlığından ciddi əziyyət çəkirlər.
Bölgədə infrastrukturun dağılması və iş yerlərinin məhv edilməsi insanların əsas ehtiyaclarını qarşılama imkanlarını məhdudlaşdırır.
Beynəlxalq humanitar təşkilatlar Qəzzada ərzaq və tibbi ləvazimat çatışmazlığının kritik həddə çatdığı barədə xəbərdarlıq edirlər.
Qəzza zolağında yaranmış vəziyyət beynəlxalq ictimaiyyətin diqqətini bölgədə atəşkəsin bərpası və humanitar yardımların davam etdirilməsinin vacibliyinə yönəldib.
Hazırda vəziyyətin nəzarətdən çıxmaması üçün beynəlxalq vasitəçilərin addımları gözlənilir.
Aybəniz Səfərova
21:22 11.03.2025
Oxunuş sayı: 1606
