Ukrayna əsgərləri dəstək gözləyir: “Silah alsaq, rusları məhv edərik”
Ukrayna və ABŞ rəsmilərinin Səudiyyə Ərəbistanında atəşkəslə bağlı görüşü cəbhə xəttində geniş müzakirələrə səbəb olub.
Crossmedia.az xarici mediaya istinadən verdiyi xəbərə görə, ukraynalı hərbçilər hesab edirlər ki, Qərbdən hərbi dəstəyin davamlı olması onların cəbhədə üstünlük qazanmasına kömək edə bilər.
Cəbhədə döyüşən ukraynalı pilotsuz uçuş aparatı (PUA) operatoru bildirib ki, Ukrayna kifayət qədər silah dəstəyi alsa, Rusiya qüvvələrini geri çəkilməyə məcbur edə bilər. O, xüsusilə hava məkanının bağlanmasının vacibliyini vurğulayıb:
"Əgər hava məkanını bağlasalar, bu, cəbhədə böyük dəyişiklik yaradacaq. Düşmən təyyarələri dayanmadan hücum edir və idarə olunan bombalarla hədəfləri məhv edirlər. Onlar cəbhənin bəzi hissələrini ələ keçirə bilmədikdə, təyyarələrini işə salır və hər şeyi dağıdırlar", – deyə hərbçi bildirib.
Onun sözlərinə görə, Ukraynanın silah təminatında çətinliklər yaranarsa, vəziyyət daha da ağırlaşa bilər.
“Əks halda, ruslarla necə danışıq aparacağımızı bilmirəm. Yeganə yol onları məğlub etməkdir. Ancaq o zaman sülhün nə olduğunu anlayacaqlar”, – deyə o əlavə edib.
Qeyd edək ki, Rusiya və Ukrayna arasında döyüşlər intensiv şəkildə davam edir. Ukrayna rəhbərliyi Qərbin hərbi dəstəyinin kritik əhəmiyyət daşıdığını vurğulayaraq, Vaşinqton və Avropadan əlavə yardım gözlədiyini bildirir.
Aybəniz Səfərova
20:50 11.03.2025
Oxunuş sayı: 12820
