BDU-dan Qars Qafqaz Universitetinin nəzdindəki Heydər Əliyev Təhsil Mərkəzinə və İğdır Azərbaycan Evinə kitab hədiyyəsi
Bakı Dövlət Universiteti (BDU) Qars şəhərində fəaliyyət göstərən Qafqaz Universitetinin nəzdindəki Heydər Əliyev Təhsil Mərkəzinə və İğdır Azərbaycan Evinə kitablar hədiyyə edib.
Crossmedia.az-ın məlumatına görə, Diasporla İş üzrə Dövlət Komitəsinin BDU-ya müraciətinə əsasən, Elmi Kitabxananın Mübadilə-ehtiyat fondundan ümumilikdə 336 nüsxə nəşr Qars və İğdır şəhərlərinə çatdırılması üçün komitənin nümayəndəsinə təqdim edilib. Qarşı tərəfin sorğusuna uyğun olaraq hədiyyə edilən kitabların arasında BDU-nun 44 günlük Vətən müharibəsi haqqında nəşrləri, “Heydər Əliyev: dil, ədəbiyyat və incəsənət” kitabı, “Heydər Əliyev - 100” biblioqrafik məlumat kitabı, universitetin 100 illik yubileyi münasibətilə buraxılmış kitablar da yer alıb.
Bu hədiyyə Türkiyənin Şərqi Anadolu bölgəsinin, xüsusilə Qars və İğdır şəhərinin Qərbi Azərbaycan əsilli soydaşlarının milli özünəməxsusluğunu qoruyub saxlaması və inkişaf etdirməsi, eləcə də Azərbaycanda çıxan kitablara əlçatanlığının təmin olunması üçün ciddi əsaslar yaradacaq.
Diasporla İş üzrə Dövlət Komitəsi isə Azərbaycan Diasporuna Dəstək Fondunun maliyyə yardımı ilə çapdan çıxmış “Heydər Əliyevin sevimli musiqi inciləri”, “Azərbaycan musiqisinin inciləri” adlı toplular, “Azərbaycan dili” adlı tədris vəsaiti, ingilis dilində “Azərbaycanın tarixi-coğrafi atlası” və s. nəşrləri BDU-nun tələbə və müəllim heyətinin istifadəsi üçün Elmi Kitabxanaya hədiyyə edib.
17:37 10.03.2025
Oxunuş sayı: 735
