Kanadada yaşayan soydaşımız medalla təltif olunub
Kanadada yaşayan soydaşımız, Alberta Azərbaycan Mədəniyyəti Cəmiyyətinin rəhbəri Ceyhun Nəcəfov Kanada cəmiyyətində göstərdiyi xidmətlərə görə “Kral III Çarlzın Tacqoyma” medalı ilə təltif olunub.
Crossmedia.az Diasporla İş üzrə Dövlət Komitəsinə istinadən xəbər verir ki, bu nüfuzlu mükafatı ona Albertanın Miqrasiya və Multikulturalizm naziri Məhəmməd Yasin təqdim edib. Ceyhun Nəcəfov Kanadada ona yaradılan imkanlara görə minnətdarlığını bildirib.
Alberta Azərbaycan Mədəniyyəti Cəmiyyətinin rəhbəri Ceyhun Nəcəfov 2012-ci ildə Kanadaya köçdükdən sonra sahibkarlıq, iş yerlərinin yaradılması və icma təşəbbüsləri vasitəsilə cəmiyyətə töhfə verməyi əsas məqsəd kimi qəbul edib. O, Kanada kimi multikultural dəyərlərə malik bir ölkədə inklüziv cəmiyyətin qurulmasına öz töhfəsini vermək üçün yorulmadan çalışır.
Diaspor fəallarının xarici ölkələrdə bu cür tanınması onların fəaliyyətinin nə qədər əhəmiyyətli olduğunun göstəricisidir. Xaricdə yaşayan soydaşlarımızın nailiyyətləri Azərbaycan diasporunun güclənməsinə xidmət edir. Azərbaycan diaspor nümayəndələrinin müxtəlif ölkələrdə mühüm uğurlara imza atması, qlobal müstəvidə xalqımızın birliyini, milli-mənəvi dəyərləri qorunması istiqamətindəki fəallığını sübut edir.
Ceyhun Nəcəfovu bu mühüm nailiyyəti münasibətilə təbrik edir, ona gələcək fəaliyyətində uğurlar arzulayırıq!
19:36 05.03.2025
Oxunuş sayı: 15520
