Zelenski-Tramp mədən sövdələşməsi: Rusiya aktivləri işə salınır!
Ukrayna prezidenti Vlodimir Zelenski ABŞ-lə qiymətli metallar üzrə saziş imzalamağa hazırlaşır.
Saziş çərçivəsində Ukraynanın nadir torpaq elementlərinin bir hissəsinin ABŞ şirkətlərinə təhvil verilməsi və dondurulmuş Rusiya aktivlərinin mineral kəşfiyyat fəaliyyətlərində istifadəsi nəzərdə tutulur.
Crossmedia.az xarici mətbuata istinadən xəbər verir ki, Zelenski əvvəlcə bu təklifi rədd etsə də, sonradan razılığa gəlib.
Cümə günü Ağ Evdə keçiriləcək görüşdə sazişin imzalanması gözlənilir. Bununla yanaşı, Zelenski ABŞ-nin Ukraynaya silah və sursat yardımı ilə bağlı Trampın mövqeyini öyrənəcək.
ABŞ prezidenti Tramp məsələ ilə bağlı açıqlamasında bildirib ki, Ukraynaya ayrılan maliyyə vəsaitlərinin geri qaytarılması vacibdir. O, həmçinin Ukraynadakı münaqişəyə son qoymaq üçün sülhməramlı missiyanın yaradılacağını və bu prosesdə ABŞ qoşunlarının da iştirak edə biləcəyini qeyd edib.
Tramp əlavə edib ki, gələcəkdə Ukraynanın müdafiəsində Avropa ölkələri daha böyük rol oynayacaq.
O, eyni zamanda Rusiyanın da əhəmiyyətli miqdarda qiymətli metallara malik olduğunu vurğulayaraq, ABŞ-ın Rusiya ərazisində mədən layihələrində iştirak etmək istədiyini bildirib.
Hazırda Rusiya ilə sanksiyaların ləğvi müzakirə olunmasa da, Tramp bunun gələcəkdə gündəmə gələ biləcəyini istisna etməyib.
19:12 26.02.2025
Oxunuş sayı: 10236
