ABŞ- Rusiya münasibətlərinin yumşalması Cənubi Qafqaza necə təsir edəcək? - RƏY
Son zamanlar Rusiya ilə ABŞ arasında münasibətlər yumşalmağa doğru gedir. İki böyük arasında "sərin küləklər" səngiyir. Həm Vaşinqtondan, həm də Moskvadan verilən mesajlar onu deməyə əsas verir ki, tərəflər konstruktiv münasibətlərdə maraqlıdırlar. Bu isə həm Kremlin, həm də Ağ Evin müxtəlif regionlarda "oyun qaydalarını" dəyişmələrinə bu və ya digər formada təsir edə bilər.
ABŞ və Rusiya arasındakı ənənəvi düşmənçilik münasibətlərinin dəyişməsinin Cənubi Qafqaza mümkün təsiri barədə Crossmedia.az-a danışan Milli Məclisin deputatı Hikmət Babaoğlu bildirib ki, Rusiya və ABŞ münasibətlərinin normallaşması beynəlxalq münasibətlər sistemində müəyyən tarazlığın və sabitliyin formalaşması baxımından vacibdir: "Siyasətin və qlobal münasibətlər sisteminin məntiqi ondan ibarətdir ki, beynəlxalq münasibətlərdə nə qədər çox güc mərkəzi olarsa, kiçik dövlətlərin öz maraqlarını qorumaq üçün manevr imkanları da bir o qədər genişlənir. Buna görə də dünya hazırda ciddi şəkildə multipolyar, yəni çoxqütblü dünya nizamına doğru irəliləyir. II Dünya müharibəsindən sonra formalaşmış beynəlxalq sistemdə dünyanın ən böyük beynəlxalq təşkilatı olan BMT-nin Təhlükəsizlik Şurasının beş daimi üzvü öz fəaliyyətləri boyunca əsasən öz maraqlarından çıxış ediblər. Əksər hallarda onlar BMT Nizamnaməsini və beynəlxalq hüququ nəzərə alsalar da, əsas prioritetləri milli və geosiyasi maraqları olub".
Deputatın sözlərinə görə, bu kontekstdə ABŞ və Rusiya arasında münasibətlərin normallaşması ümumi baxımdan müsbət qiymətləndirilə bilər. "Lakin konkret regionlarda, xüsusilə də Rusiya və ABŞ-nin beynəlxalq hüquqa obyektiv yanaşmadığı bölgələrdə bu yaxınlaşma müəyyən təzyiqlər yarada bilər. Azərbaycana gəldikdə isə biz həmişə belə qərəzli və birtərəfli mövqelərin yaratdığı təzyiqləri hiss etmişik. 30 il ərzində ABŞ, Rusiya və Fransanın Ermənistan-Azərbaycan münaqişəsinə yanaşması, demək olar ki, eyni olub. Bu səbəbdən problemi həll edə bilməmişik. Lakin keçmiş ATƏT-in Minsk Qrupunun həmsədrləri arasında uzlaşmanın itməsi bizə tarixi fürsət yaratdı ki, ərazi bütövlüyümüzü bərpa edək".
H.Babaoğlu bu yaxınlaşmanın əvvəlki kimi birtərəfli maraqlara deyil, beynəlxalq hüququn üstünlüyünə və ədalətin təmin olunmasına xidmət edəcəyinə ümid etdiyini qeyd edib: " Belə olduğu təqdirdə, bu proses müsbət hal kimi qiymətləndirilə bilər. Lakin ABŞ və Rusiya arasında yaxınlaşma, eyni zamanda, onların maraq dairəsinə daxil olmayan və ya ortaq maraqlarının obyekti olan ərazilərdə diplomatik, siyasi, iqtisadi və maliyyə imkanlarını məhdudlaşdıra bilər. Bu aspekt də nəzərə alınmalıdır".
Fatimə Məmmədova
16:59 26.02.2025
Oxunuş sayı: 5659
