Kişineuda Xocalı soyqırımı qurbanlarının xatirəsi anılıb
Azərbaycanın Moldovadakı səfirliyinin təşkilatçılığı ilə Kişineuda Xocalı soyqırımının 33-cü ildönümünə həsr olunmuş konfrans keçirilib.
Crossmedia.az xəbər verir ki, konfransdan əvvəl tədbir iştirakçıları ölkəmizin Moldovadakı səfirliyinin qarşısında ucaldılmış “Xocalı” barelyefi önünə gül dəstələri düzüblər.
Tədbirdə Moldova parlamentinin deputatları, ictimaiyyətin təmsilçiləri, diplomatik korpusun nümayəndələri, tarixçilər, Azərbaycan Respublikasının Diasporla İş üzrə Dövlət Komitəsinin əməkdaşı, jurnalistlər, Moldovada yaşayan azərbaycanlılar iştirak ediblər.
Əvvəlcə tədbir iştirakçıları faciə qurbanlarının xatirəsini bir dəqiqəlik sükutla yad ediblər.
Konfransda çıxış edən Azərbaycanın Moldovadakı səfiri Ülvi Baxşəliyev Xocalı soyqırımının Azərbaycan xalqının XX əsrdə üzləşdiyi ən dəhşətli faciələrdən biri olduğunu qeyd edib. Qeyd edib ki, 200 il ərzində Azərbaycan xalqı dəfələrlə erməni şovinistləri tərəfindən etnik təmizləmə və soyqırımına məruz qalıb. Azərbaycanlılar Qərbi Azərbaycandakı tarixi torpaqlarından qovulub, qaçqın və məcburi köçkünə çevrilib və bütün bunlar ermənilərin törətdiyi kütləvi qırğınlarla müşayiət olunub.
“Bu qanlı hadisələrə münasibət bildirən Azərbaycan xalqının Ümummilli Lideri Heydər Əliyev bildirib ki, Azərbaycan xalqına qarşı yönəldilmiş Xocalı soyqırımı öz ağlasığmaz qəddarlığı və qeyri-insani repressiya üsulları ilə bəşər tarixində bir vəhşilik aktıdır. Bu soyqırımı, eyni zamanda, bütün bəşəriyyətə qarşı tarixi cinayətdir.
Səfir diqqətə çatdırıb ki, bu faciəyə görə məsuliyyət daşıyanların ifşası və müvafiq məlumatların dünya ictimaiyyətinə geniş şəkildə çatdırılması Azərbaycan Prezidenti İlham Əliyev tərəfindən ölkənin xarici siyasətinin prioritet istiqamətlərindən biri kimi müəyyən edilib.
Diplomat diqqəti soyqırımı ilə bağlı məlumatların dünya ictimaiyyətinə çatdırılmasında Heydər Əliyev Fondunun vitse-prezidenti Leyla Əliyevanın xüsusi roluna çəkib. Ü.Baxşəliyev vurğulayıb ki, 2008-ci ildən başlayaraq onun təşəbbüsü və rəhbərlik etdiyi “Xocalıya ədalət!” beynəlxalq kampaniyası erməni millətçilərinin əsl simasını ifşa edir.
Moldova parlamentinin deputatı, Moldova-Azərbaycan parlamentlərarası dostluq qrupunun sədri Vitali Jakot Xocalıda baş vermiş faciəli hadisələrin Azərbaycan xalqı üçün ağır sınaq olduğunu qeyd edib. O əlavə edib: “1992-ci ilin həmin faciəli gecəsində 613 dinc sakin, o cümlədən uşaqlar, qadınlar və qocalar ermənilər tərəfindən vəhşicəsinə qətlə yetirilib.
Biz baş verənləri aydın və barışmaz şəkildə soyqırımı kimi qiymətləndiririk. Bu faciə azərbaycanlıların qəlbində silinməz iz qoyub, xalqın ağrı və kədər rəmzinə çevrilib. Belə tədbirlərdə iştirakımız təkcə bizi birləşdirmir, həm də bütün Azərbaycan xalqı ilə həmrəy olduğumuzu nümayiş etdirir”.
Moldova Azərbaycanlıları Konqresinin sədri Elçin Bayramov çıxışından bildirib ki, Xocalı faciəsi Azərbaycan tarixinin qanlı səhifəsidir, günahsız insanlar sırf azərbaycanlı olduqları üçün öldürülüb. Natiq, həmçinin bütün dünyada, o cümlədən Moldovada hər il “Xocalıya ədalət!” kampaniyasının keçirilməsinə dəstək verən Azərbaycan Prezidenti İlham Əliyevin və Birinci vitse-prezident Mehriban Əliyevanın mühüm rolunu qeyd edib. Konqresin sədri erməni işğalından azad edilmiş rayonlarda, o cümlədən Xocalıda aparılan genişmiqyaslı quruculuq və bərpa işləri barədə də məlumat verib.
15:18 25.02.2025
Oxunuş sayı: 12369
