Haaqada Xocalı soyqırımından bəhs edən kitabların təqdimatı olub
Niderland Krallığının Haaqa şəhərində Xocalı sakini, ailə üzvlərini Xocalı faciəsində itirmiş jurnalist, yazıçı-publisist Səriyyə Müslümqızının “Onlar heç zaman böyüməyəcəklər” (Ze werden nooit volwassen) və “Xocalıdan gələn var” (Geesten uit Khojaly) adlı kitablarının Niderland dilində təqdimatı olub.
Qeyd edək ki, Xocalı soyqırımının 33-cü ildönümü ilə bağlı Niderland Krallığında anım mərasimi də keçirilib. Haaqa şəhərində Xocalı faciəsi qurbanlarının xatirəsini əbədiləşdirən abidə ziyarət olunub. Xocalı soyqırımı qurbanları, Vətən uğrunda şəhid olmuş qəhrəmanların xatirəsi bir dəqiqəlik sükutla anılıb. Abidə önünə əklil və çiçəklər qoyulub.
Yazıçı Henri van Rens tərəfindən tərcümə olunmuş, o dəhşətli gecəni təsvir edən bu kitab iştirakçılar tərəfindən böyük maraqla qarşılanıb. Kitabın Niderland dilinə tərcümə olunmasının əsas səbəbi isə Beynəlxalq Ədalət Məhkəməsinin məhz Niderland Krallığında yerləşməsidir. Müəllif, 32 ildən sonra Xocalıya qayıdan Səriyyə Müslüm qızı çıxışında bildirib ki, Niderland Xocalı soyqırımını törədənlərin cəzalandırılmasını təmin etməlidir. Uzun illər həsrətində olduğu Xocalıya yenidən həyatın qayıtmasından danışan Səriyyə Müslümqızı bundan sonra xalqımızın bir daha belə məşəqqətlər görməməsini arzulayıb. (Azərtac)
14:13 25.02.2025
Oxunuş sayı: 982
