Paşinyan dini tolerantlıqdan danışdı, amma gerçəkləri görməzlikdən gəldi
Ermənistanın Baş naziri Nikol Paşinyan ABŞ-nin paytaxtı Vaşinqtonda keçirilən V Beynəlxalq Dini Azadlıq Sammitində çıxış edərək, dini tolerantlığın Cənubi Qafqazın sabitliyi üçün vacib olduğunu bildirib.
Crossmedia.az xəbər verir ki, bu barədə xarici KİV yazıb.
Belə ki, N.Paşinyan bölgədə dini dözümlülük və qarşılıqlı hörmət ənənəsinin mövcud olduğunu vurğulayıb və regional mübahisələri dialoqa çevirmək niyyətində olduqlarını deyib. O, həmçinin Ermənistanın demokratiyasının ayrılmaz hissəsi kimi dini azadlığa böyük önəm verdiklərini, ölkədə yalnız Erməni Apostol Kilsəsinin deyil, digər dini icmaların da sərbəst fəaliyyət göstərdiyini qeyd edib.
Lakin o, Ermənistanın Azərbaycan İslam mədəni irsinə qarşı həyata keçirdiyi vandallıq aktlarından danışmayıb. Ermənistan ərazisində Azərbaycan tarixi-mədəni irsinin məhv edilməsi, işğal dövründə dini abidələrin təhqir olunması, məscidlərin dağıdılması və tövlə kimi istifadəsi barədə heç nə deməyib.
Bütün bunlara baxmayaraq, Paşinyan Ermənistanın dini azadlığa xüsusi önəm verdiyini iddia edir.
Xatırladaq ki, işğal dövründə 67 məsciddən 65-i tamamilə dağıdılıb, 2-si isə ciddi zərər görüb. Bundan əlavə, 900-dən çox müsəlman qəbiristanlığı vandalizmə məruz qalıb.
Fatimə Məmmədova
11:59 06.02.2025
Oxunuş sayı: 6143
