Qızdırma ilə mübarizədə doğru bildiyimiz yanlış - Həkim çağırış etdi
Temperatur salmaq üçün həddindən artıq dərman içərək komaya düşən gənc sağalıb.
Bu barədə Kliniki Tibbi Mərkəz (KTM) məlumat
yayıb.
Xəstəyə qaraciyər hüceyrə çatışmazlığı və
meninqoensefalit diaqnozları qoyulub.
Məlum olub ki, pasiyent yüksək temperaturu olduğu üçün həkim nəzarəti olmadan, gün ərzində həddindən artıq qəbul etdiyi temperatur salmaq üçün nəzərdə tutulmuş dərmanlardan zəhərlənib.
İnsanlar çox vaxt qızdırma hiss etdikdə dərhal dərman və ya iynə istifadə etməyə meyllidirlər. Lakin, bu cür müdaxilələr həkim nəzarətindən kənar həyata keçirildikdə, bəzən doğru bildiyimiz yanlışlara yol verə bilərik. Qızdırmanın özünü göstərməsi, bədənin birbaşa xəstəliklə mübarizə apardığını göstərir və bu prosesə müdaxilə etmək, həmişə faydalı nəticələr vermir.
Həkim nəzarətindən kənar qızdırmaya
qarşı mübarizə və doğru müdaxilə yolları barədə Crossmedia.az-a danışan həkim,
professor Adil Qeybulla bildirib ki, qızdırma orqanizmin müdafiə reaksiyasıdır:
“Bu, orqanizmə daxil olan mikroblar, viruslar, bakteriyalar və s. ilə mübarizə
aparmaq üçün təbii bir cavabdır. Bu normal vəziyyətdir. Ona görə də qızdırmanı
dərhal aşağı salmağa cəhd etmək düzgün deyil. Təəssüf ki, bəzən buna üstünlük
verilir və bu, yanlış nəticələrə səbəb ola bilər”.
Həkim qeyd edib ki, qızdırma həddindən artıq yüksəlirsə, müdaxilə etmək vacibdir: “Məsələn, qızdırma müəyyən bir müddət ərzində 38°C-ə qədər qalxa bilər. Bu halda dərhal qızdırmanı aşağı salmağa çalışmaq lazım deyil, amma uşaqlarda tempuratur 38°C-dən yuxarı qalxarsa, diqqətli olmaq və onun daha da artmasına imkan verməmək vacibdir”.
Onun sözlərinə görə, bir çox hallarda,
“paracetamol” əsaslı dərmanlar qəbul edildikdə qaraciyər problemləri və komatoz
vəziyyətlər yarana bilər: “Qeyd etmək lazımdır ki, “parasetamol”bəzən qaraciyər
çatışmazlığına səbəb ola və bu, ölümlə nəticələnə
bilər. Buna görə də, həkim nəzarəti olmadan dərman qəbul etmək və qızdırmanı dərhal
aşağı salmağa çalışmaq lazım deyil. Eyni şəkildə, öskürək və bəlğəm çıxaran dərmanları
da həkim nəzarəti olmadan istifadə etmək məsləhət deyil”.
Fidan Hacızadə
18:22 27.01.2025
Oxunuş sayı: 16735
