Elm və təhsil
BDU-da “Fotojurnalistikaya Dəstək Proqramı” çərçivəsində təlimlər start götürüb
- Bakı Dövlət Universitetində "Fotojurnalistikaya Dəstək Proqramı” çərçivəsində "Fotojurnalistika sənətinin yaradıcı sənaye obyekti kimi kommersiyalaşdırılmasına dəstək” mövzusunda təlimlər başlayıb.
- Crossmedia.az xəbər verir ki, təlimlər, Azərbaycan Respublikası Mədəniyyət Nazirliyi, Bakı Dövlət Universiteti, Mətbuat Şurası və "Qızılbaş” Gəncləri Maarifləndirmə İctimai Birliyinin təşkilatçılığı ilə keçirilir.
- Tədbirdə medianın fotojurnalistika sahəsi üzrə mütəxəssislər, Bakı Dövlət Universitetinin Jurnalistika fakultəsinin dekanı Vüqar Zifəroğlu, Jurnalistika fakultəsinin dekan müavini Samir Xalidoğlu, "Yeni Çağ” Media Qrupunun rəhbəri Aqil Ələsgər və tələbələr iştirak ediblər.
- Təlimi açıq elan edən dekan müavini Samir Xalidoğlu bildirib ki, aşağı kurs tələbələrinin maraq göstərərək təlimə yazılması sevindirici haldır. "Bu təlimin tələbələr üçün əhəmiyyəti böyükdür. Oxuduqları ixtisasın fotojurnalistika sahəsini öyrənmək digərləri ilə müqayisədə bir pillə öndə olmaq deməkdir”, – deyə o bildirib.
- Bakı Dövlət Universitetinin Jurnalistika fakultəsinin dekanı Vüqar Zifəroğlu isə təlimlə bağlı ideya ortaya qoyulduqda xüsusilə jurnalistika fakultəsində keçirilməli olduğunu diqqətə çatdırıb. "Düzdür, əlavə alternativlər var idi. Lakin fotojurnalistikaya həm tələbat, həm də marağın olması təlimin məhz jurnalistika fakultəsində həyata keçirilməsini daha məqsədəuyğun edir”, – deyə dekan qeyd edib.
- Azərbaycan Mətbuat Şurası İdarə Heyətinin üzvü Aqil Ələsgər əlavə edib ki, bu gün texnologiya əlimizdəki telefonlar ilə gəlir əldə etməyə imkan verir. "İnsan işindən gəlir əldə etdikcə həmin peşəni ikiqat sevir. Belə bir təlimin keçirilməsi isə tələbələrin gələcək fəaliyyətində uğurlu olmasında mühüm rol oynayır”, – o deyib.
- Çıxışlardan sonra "Qızılbaş” Gəncləri Maarifləndirmə İctimai Birliyinin fotojurnalistika sahəsindən necə gəlir əldə etməklə bağlı hazırladığı film tələbələrə nümayiş etdirilib.
- Daha sonra Bakı Dövlət Universitetinin Jurnalistika fakultəsinin müəllimi, fotojurnalistika üzrə mütəxəssis Mirakif Babayev təlimə başlayıb və tələbələri bu sahənin ilkin anlayışları barədə məlumatlandırıb.
- Xatırladaq ki, "Fotojurnalistikaya Dəstək Proqramı” çərçivəsində "Fotojurnalistika sənətinin yaradıcı sənaye obyekti kimi kommersiyalaşdırılmasına dəstək” mövzusunda keçirilən təlim 4 gün davam edəcək.
17:38 22.01.2025
Oxunuş sayı: 12179
