Rayonda həkim çatışmazlığı? - Vətəndaş şikayətinə TƏBİB-dən CAVAB
Sabirabad rayonu Bulaqlı kəndində yaşayan bir vətəndaşın təcili tibbi yardım xidməti ilə bağlı narazılığı sosial şəbəkələrdə geniş müzakirələrə səbəb olub. Vətəndaş təcili yardıma ehtiyac olduğu halda "skorunun mövcud olmadığı və çağırışda olduğu" cavabını aldığını iddia edib. Lakin vətəndaş təcili yardım məntəqəsinə yaxınlaşaraq video çəkib və orada 8 təcili yardım avtomobilinin mövcud olduğunu göstərib.
Crossmedia.az məsələni araşdıraraq Tibbi Ərazi Bölmələrini İdarəetmə Birliyinin (TƏBİB) mətbuat xidməti ilə əlaqə saxlayıb. Qurumdan verilən açıqlamada bildirilir ki, Təcili tibbi yardım xidməti - xüsusi hazırlıq keçmiş mütəxəssislərdən ibarət, müasir tibb avadanlıqları ilə təchiz olunmuş, əhaliyə xəstəxanayaqədər mərhələdə (hadisə yerində və təxliyə zamanı), tibb müəssisələrində təcili və təxirəsalınmaz tibbi yardım göstərən şəbəkədir.
Həmçinin vurğulanıb ki, təcili tibbi yardım stansiyalarının həyətində ambulansların park vəziyyətində olması onların xidmətə hazır olduğu anlamına gəlmir. Çünki ambulansların çağırışa yollanması üçün yüksək ixtisaslı həkim, tibb bacısı və ilkin təcili yardım təlimi almış sürücüdən ibarət briqada formalaşdırılmalıdır. Bu səbəbdən xidmətdən kənar ambulanslar təcili tibbi yardım stansiyalarının həyətində park vəziyyətində qala bilər.
Qurum həmçinin qeyd edib ki, Sabirabad rayonu üzrə təcili tibbi yardım stansiyasında video çəkən şəxsin müraciəti zamanı bütün briqadalar digər çağırışların icrasında olub. Sözügedən şəxs 20.01.2025-ci il tarixində saat 19:41-də təcili tibbi yardıma “xəstəmiz var” səbəbilə müraciət edib, elə həmin anda da çağırışdan imtina edib. Sonra isə stansiyanın həyətinə daxil olaraq çəkiliş aparmağa başlayıb.
Nihat Tahirov
16:57 22.01.2025
Oxunuş sayı: 16617
