"Donuz qripinin Azərbaycanda da yayılma ehtimalı varmı?"- Həkimdən açıqlama
Dünyada müxtəlif virusların yenidən yayılması ilə bağlı xəbərlər artıb. Xüsusilə donuz qripi (A/H1N1) virusu bir çox ölkədə ciddi narahatlıq yaradıb. Bu virusun insan sağlamlığı üçün təhlükəli olduğu, sürətlə yayılaraq ağır fəsadlara səbəb ola biləcəyi bildirilir. Ölkəmizdə də əhalinin sağlamlığının qorunması məqsədilə profilaktik tədbirlərin görülməsi vacibdir.
Donuz qripinin yayılması və bu təhlükəli xəstəliyə qarşı necə mübarizə apara biləcəyimiz barədə həkim - terapevt Məlahət Hümmətqızı Crossmedia.az- a açıqlama verib.
Terapevtin sözlərinə görə, son günlər dünyanın bir çox ölkələrində donuz qripi (A/H1 N1) virusunun yayılması haqqında mətbuatda məlumatlar yayılır: “Ümumdünya Səhiyyə Təşkilatının (ÜST) məlumatına görə, bu virus (A /H1N1) insan orqanizmi üçün daha təhlükəli virus sayılır. Rahatlıqla heyvanlardan insana və insandan insana hava-damcı yolu ilə keçə bilir. Cəmi bir neçə gün ərzində ürək, ağciyər, qaraciyər və beynin işini poza və ölüm riskini artıra bilir. 2009-cu ildə sözügedən virus pandemiya yaratmışdı və bir çox ölkələri əhatə edərək, yüzlərlə insanın ölümünə səbəb olmuşdu. Donuz qripi indi də mövsümi qrip viruslarından biri kimi insanlar arasında yayılmaqda davam edir. Çünki genetik mutasiya A/ H1N1-in keçiciliyinə səbəb olur”.
M.Hümmətqızının fikrincə, insanların, heyanların və ətraf mühitin sağlamlığı bir-biri ilə sıx bağlıdır: “Bir çox virusun hava-damcı yolu ilə yayıldığını nəzərə alsaq bu virusun qonşu ölkələrdən Azərbaycana da keçmə ehtimalı var. Adi öskürək və asqırıqla ətrafa yayılan damcılar, xəstə insanla kontakt xəstəliyi yaya bilir. Bunun üçün ölkədə qabaqlayıcı tədbirlər görülməli - sərhəd keçid zonalarına nəzarət olunmalı, xüsusilə məktəblərdə, bağçalarda proflaktik tədbirlər aparılmalı, maarifləndirmə işləri gücləndirilməlidir. Ərazi poliklinkalarında könüllü olaraq mövsümi qripə qarşı peyvəndlər vurularsa, bu, xəstəliyin şiddətini azaldar, baş verəcək ciddi fəsadların - yəni yoluxmanın az da olsa qarşısını alar. Çölə çıxarkən, xüsusilə soyuq, nəmli və yağışlı havalarda maska taxmalı, qripə yoluxmuş insanlar immunitetlərini gücləndirmək üçün antiviral dərmanlardan istifadə etməli, bol maye qəbul etməli, qrip zamanı simptomlar keçməyənə qədər ictimai yerlərdən uzaq durmalı, asqırarkən və ya öskürərkən ağız əllə tutulmalı, evə gələrkən əllər yuyulmalı, şəxsi gigiyena qaydalarına riayət olunmalıdır”.
Həkim həmçinin qripin göstəricilərindən və qarşısını almaq üçün müəyyən tədbirlərin görülməsindən də bəhs edib: “Donuz qripi simptomlarına görə adi qripdən fərqlənmir. Qızdırma, öskürək, boğaz ağrısı, baş ağrısı, oynaqlarda ağrı, üşütmə, halsızlıq, ürəkbulanma və bəzən ishal da müşahidə olunur. Sadaladığım simptomları özündə müşahidə edən, habelə donuz qripi yayılmış ölkədən qayıdanlar həkimə müraciət etməlidirlər. Donuz qripinə yoluxan şəxs xəstəxanaya yerəşdirilməlidir. Nəzərə almaq lazımdır ki, insanın bu virusa yoluxmasını yalnız laboratoriyada müəyyən etmək olur.
Onu da qeyd edim ki, son bir neçə ayda əhali arasında qripə yoluxma halları çoxalsa da, ölkəmizdə epidemiya üçün heç bir əsas yoxdur. İnsanlar bir neçə gün ərzində müalicə olunduqdan sonra sağalır və normal iş həyatına qayıdır”.
Fidan Hacızadə
11:40 21.01.2025
Oxunuş sayı: 9875
