Meymunçiçəyi pandemiyaya çevrilə və geniş yayıla bilərmi?
Azərbaycanda meymunçiçəyi virusuna ilk yoluxma hadisəsi qeydə alınıb.
Bəs bu vəziyyət ölkədə virusun yayılma riski haqqında nə deyir?
Mövzu ilə bağlı tibb elmləri doktoru, professor Adil Qeybulla Crossmedia.az-a verdiyi açıqlamada bildirib ki, meymunçiçəyi virusu çiçək virusları qrupuna aiddir:
"Bu qrupa suçiçəyi, təbii çiçək və meymunçiçəyi daxildir. Virusun inkubasiya dövrü bir həftədən çox ola bilər və bu, immun sistemin gücü ilə bağlıdır. Xəstəlik özünü göstərdiyi andan xüsusilə ilk dövrlərdə dəridə irinli səpkilər, yəni içi bulanıq, sarımtıl maye ilə dolu səpkilər yaranır. Bununla yanaşı, limfa düyünlərinin böyüməsi və qızdırma müşahidə olunur ki, bu dövrdə xəstəlik yoluxucudur.
Xəstəliyin xüsusi spesifik peyvəndi yoxdur. Lakin təbii çiçək peyvəndinin ona qarşı effektiv olduğu düşünülür. Məhz bu vaksinasiyanın nəticəsində təbii çiçək 1980-ci ildə dünyadan tamamilə aradan qaldırıldı. Meymunçiçəyi virusu təbii çiçək qədər təhlükəli deyil. İnsanlarda adətən yüngül keçsə də, ağırlaşma halları mümkündür".
Adil Qeybulla xəstəliyin əsas əlamətlərindən də danışdı:
"Dəridə səpkilər, limfa düyünlərinin böyüməsi, qızdırma, halsızlıq, baş, bel və əzələ ağrıları xəstəliyin əsas əlamətləridir. Xəstəlik adətən öz-özünə sağalır, lakin immun sistem zəif olduqda və ya əlavə bakterial infeksiyalar qoşulduqda ağırlaşa və hətta ölümə səbəb ola bilər.
Hazırkı vəziyyətdə xəstəliyin pandemiya yaratma ehtimalı çox aşağıdır, lakin xırda epidemik ocaqlar baş verə bilər. Buna görə də xəstələnən zaman yataq rejiminə riayət edib başqalarını yoluxdurmamaq üçün tədbirlər görmək vacibdir".
14:53 18.01.2025
Oxunuş sayı: 2533
