"Bölgələrdə maarifləndirmə tədbirlərinin təşkil olunması müsbət haldır" - AÇIQLAMA
Azərbaycanda mədəniyyət, zəngin tarixi və müxtəlif etnik qrupların bir araya gəlməsi ilə formalaşıb. Ölkənin mədəni irsi, musiqi, ədəbiyyat, rəssamlıq, teatr, xalq ənənələri və mətbəx kimi sahələrdə özünü göstərir. Bu mədəniyyət, tarixi dərinliyi, zəngin ənənələri və müasir inkişafı ilə fərqlənir. Belə bir mədəniyyətin təbliğində və inkişafında Mədəniyyət Nazirliyi də mühüm rol oynayır. Nazirlik bu istiqamətdə plan və proqramlar hazırlayır, onu icra edir. Bu baxımdan da, hər il ölkədə müxtəlif tədbirlər, mədəniyyətimizin təbliği, tanıdılması istiqamətində, istedadların dəstəklənməsi, üzə çıxarılması üçün müxtəlif layihələr, çalışmalar həyata keçirilir.
Filologiya üzrə fəlsəfə doktoru, "Kitab Evi" İctimai Birliyinin sədri Adilə Nəzərova bu tip tədbirlər və onların həyata keçirilməsi ilə bağlı fikirlərini Crossmedia.az-la bölüşüb:
"Azərbaycan Respublikası Mədəniyyət Nazirliyinin ilk olaraq, ötən ilki uğurlarına nəzər salaq. Keçən il Qazaxıstan, Özbəkistan, Qətərdə Azərbaycan Mədəniyyəti Günlərinin təşkilini qeyd etmək olar. Eyni zamanda, Azərbaycanda Rusiya, Tacikistan, Belarus və Qırğızıstan Mədəniyyət Günləri keçirildi. Bu tədbirlər, əlbəttə ki, Azərbaycan mədəniyyətinin – tariximizin, ədəbiyyatımızın, incəsənətimizin, musiqimizin və rəng dünyamızın tanıdılmasına xidmət edir.
2024-cü ildə Mədəniyyət Nazirliyi tərəfindən yeni proqramlar, beynəlxalq və respublika üzrə geniş layihələr həyata keçirildi. Hazırda davam edən layihələr də çoxluq təşkil edir. Mədəniyyət Nazirliyi yanında İctimai Şura da Tədbirlər Planına uyğun olaraq, bir neçə tədbir və İctimai dinləmələr təşkil etdi. Bakıda və regionlarda keçirilən ictimai dinləmələr xüsusilə yaddaqalan oldu. Həmin dinləmələrdə mədəniyyət müəssisələrinin nümayəndələrinin çıxışlarını dinlədik, çatışmazlıqlar və problemləri onların dilindən eşitdik. Nazirlik təmsilçilərinin iştirak etdiyi dinləmələrin əsasında deyə bilərəm ki, uğurlarla bərabər nöqsanların da olduğu cəmiyyətə bəlli oldu. Bu da normaldır, çünki iş olan yerdə nöqsan nəzərə çarpır. Mən özüm də ötən il, Mədəniyyət Nazirliyinin dəstəyi ilə bir layihə həyata keçirdim. Layihə tədbirləri bir neçə bölgədə baş tutdu və bu vasitə ilə regional idarəetmə sisteminin işinin də şahidi oldum. Yeri gəlmişkən, regional mədəniyyət idarələrinin fəaliyyətini, daha doğrusu sistemin qurulmasını müsbət dəyərləndirirəm. Bölgələrdə maarifləndirmə tədbirləri təşkil olunur ki, bu da müsbət haldır".
Mədəniyyət sahəsində baş verən yeniliklərə gəlincə isə Adilə Nəzərova əlavə edib:
"Bu günlərdə bir sevindirici məlumatla tanış oldum və sizin saytınız vasitəsilə bu məlumatı bir daha çatdırmaq istəyirəm ki, Mədəniyyət Nazirliyi və Azərbaycan Respublikası Kino Agentliyinin (ARKA) sifarişi ilə dahi Azərbaycan şairi və mütəfəkkiri Nizami Gəncəviyə həsr olunan “Nizami: daxili aləm” sənədli filmi çəkilib, film yanvarın 25-də "AnewZ" kanalı vasitəsilə yayımlanacaq. Sözügedən film, beynəlxalq səviyyədə təbliğ olunacağı üçün ingiliscə alt yazı ilə hazırlanıb. Əlbəttə ki, Nizami Gəncəvinin yaradıcılığının beynəlxalq aləmdə yeni versiyada tanıdılması, eyni zamanda Azərbaycan mədəniyyətinin, ədəbiyyatının təbliğinə böyük töhfədir. Belə bir məqamda, gənc istedadların dəstəklənməsi üçün həyata keçirilən mövcud proqramların da rolunu qeyd etmək lazımdır. Bu baxımdan QHT-lər də Nazirliklər birgə tarix, ədəbiyyat, incəsənət və musiqi sahəsində davamlı və səmərəli işlər görür, mədəni və sosial layihələr həyata keçirir, istedadlı gənclərin peşəkar inkişafına dəstək olurlar. Eləcə də innovativ təşəbbüslərlə çıxış edir, kitablar nəşr edir, yeri gəldikdə digər türk ölkələrində ölkəmizi layiqincə təmsil edirlər".
Aytac Kərimova
08:50 18.01.2025
Oxunuş sayı: 23972
