Bakıda mühüm görüş: Bayramovla Fidan yeni dünya nizamını müzakirə edəcəklər
Türkiyənin xarici işlər naziri Hakan Fidan yanvarın 18-də Bakıya gələcək. Fidanın səfər çərçivəsində yüksək səviyyəli görüşləri nəzərdə tutulub. Görüşlərdə ikitərəfli siyasi, hərbi, iqtisadi, ticarət, nəqliyyat və enerji məsələlərinin müzakirə ediləcəyi bildirilib. Regionda və dünyada çox ciddi hadisələrin baş verdiyi bir vaxtda Türkiyənin baş diplomatının Bakıya səfəri diqqət çəkir.
Gözlənilən səfər barədə Crossmedia.az-a danışan siyasi şərhçi Turab Rzayev Cənubi Qafqazda ciddi dəyişiklərin baş verdiyinə diqqət çəkib: "Ermənistanın ABŞ ilə strateji tərəfdaşlığı yeni reallıqlar yaradır. Həmçinin Suriyadakı hakimiyyət dəyişikliyi də yeni perspektiv vəd edir. Azərbaycan Suriya məsələsində Türkiyənin yanındadır. İki dövlət koordinasiyalı hərəkət edəcək. Həmçinin Azərbaycan-İsrail, Azərbaycan-İran münasibətləri də gündəlikdə olacaq. Son zamanlar rəsmi Tehran müxtəlif formalarda Bakıya qarşı qeyri-adekvat bəyanatlar verir. Bu da ikitərəfli münasibətlərə təsir edir. Bundan başqa, Azərbaycan Hava Yollarına məxsus təyyərənin vurulmasından sonra Bakı ilə Moskva arasında yaranan gərginlik müzakirə ediləcək. Gürcüstan baş naziri İrakli Kobaxidze dünən Azərbaycanda səfərdə idi. Yəqin ki, H.Fidan bu səfərin nəticələri barədə də həmkarı Ceyhun Bayramovla fikir mübadiləsi aparılacaq. ABŞ-ın yeni seçilmiş prezidenti Donald Tramp bir neçə günə vəzifəsinə başlayacaq. Bu, rəsmi Vaşinqtonun regional siyasətində dəyişikliklərlə nəticələnə bilər. Bu mənada baş diplomatların görüşü həm də yeni mərhələyə hazırlıqdır. Biz sözlə, yeni dünya nizamı müzakirə olunacaq".
Analitik, bölgə ilə bağlı mühüm məsələlərin gündəlikdə ola biləcəyini vurğulayıb: "Ermənistanın ABŞ-la imzaladığı sənəd göstərir ki, İrəvan Qərbə inteqrasiyada israrlıdır. Əvvəllər belə cəhdlər olsa da, Rusiyanın təzyiqi ilə geri addım atılıb. İndi isə geri yol yoxdur. Həmçinin Ermənistanın Avropa İttifaqına üzvlük məsələsi gündəmə gəlib. Ermənistan buna hazır olmasa da, yaxın günlərdə Aİ-yə üzvlük statusu qazana bilər. Bu, Rusiyanın narazılığı ilə nəticələnəcək. Beləliklə, bölgədə yeni gərginlik yarana bilər. Əgər Moskva özünü buna hazır etsə, Cənubi Qafqazda Ukrayna ssenarisi təkrarlana bilər".
O, iqtisadi əməkdaşlıq barədə də danışıb: "Bundan başqa iqtisadi məsələlər, o cümlədən, qarşılıqlı əməkdaşlıq, yeni yaşıl enerji layihələri barədə müzakirə olunacaq. Çünki həmin layihələrin bir çoxu Türkiyə və Qara dənizdən keçir".
Nərgiz Camalzadə
15:22 17.01.2025
Oxunuş sayı: 7797
