Praqada iki sərnişin qatarı toqquşub, azı 15 nəfər yaralanıb
Çexiyanın paytaxtı Praqada iki sərnişin qatarının toqquşması nəticəsində azı 15 nəfər xəsarət alıb.
Crossmedia.az xəbər verir ki, Çexiyanın "iDNES.cz" nəşri bu barədə məlumat yayıb.
Bildirilib ki, hadisə noyabrın 17-də səhər saatlarında Praqanın Baş Dəmiryol Vağzalı yaxınlığında, Seyfert küçəsi üzərindəki dəmir yolu körpüsündə baş verib.
İlkin məlumatlara görə, iki sərnişin qatarı eyni dəmir yolu xəttində üz-üzə gələrək toqquşub.
Çexiya polisinin məlumatına əsasən, qəza nəticəsində azı 15 nəfər xəsarət alıb. Yanğınsöndürmə xidmətinin nümayəndələri isə yaralıların sayının daha çox ola biləcəyini, onların əksəriyyətinin yüngül xəsarət aldığını bildiriblər.
Hadisə yerinə polis, təcili tibbi yardım və yanğınsöndürmə briqadaları cəlb olunub.
Qəza səbəbindən Praqanın Baş Dəmiryol Vağzalı ətrafında qatarların hərəkəti dayandırılıb. Bəzi reyslər alternativ dəmir yolu stansiyalarına yönləndirilib.
Hadisənin başvermə səbəbləri araşdırılır.
12:46 17.11.2026
Oxunuş sayı: 112