Dünya çempionu olmuş futbolçu Almaniya prezidentliyinə namizəd göstərilib
1990-cı ildə futbol üzrə dünya çempionu olmuş və bir müddət Türkiyənin "Adanaspor" klubunda çıxış etmiş Tomas Bertold Almaniya prezidentliyinə namizəd göstərilib.
Crossmedia.az xəbər verir ki, "Deutschlandfunk" bu barədə məlumat yayıb.
Almaniyanın sağ radikal "Almaniya üçün Alternativ" (AfD) partiyası 62 yaşlı keçmiş futbolçunun 2027-ci il yanvarın 30-da keçiriləcək prezident seçkilərində namizəd olacağını açıqlayıb.
Partiyanın həmsədrləri Alis Vaydel və Tino Xrupalla Bertoldun heç bir siyasi partiyanın üzvü olmadığını vurğulayaraq onun bütün almanları təmsil edə biləcəyini bildiriblər.
Qeyd olunur ki, Bertoldun namizədliyinin irəli sürülməsində onun COVID-19 pandemiyası dövründə hökumətin tətbiq etdiyi məhdudiyyətlərə və peyvənd siyasətinə qarşı çıxışları da rol oynayıb.
Keçmiş futbolçu peşəkar karyerasına "Ayntraxt Frankfurt" klubunda başlayıb. Daha sonra "Bayern Münhen", "Ştutqart", "Verona" və "Roma" kimi klublarda forma geyinib.
Almaniya millisinin heyətində 62 oyun keçirən Bertold 1990-cı ildə İtaliyada təşkil olunan dünya çempionatının qalibi olub.
O, 2001-ci ilin yanvarında Türkiyənin "Adanaspor" klubuna transfer edilib və təxminən altı ay sonra futbolçu karyerasını başa vurub.
Almaniyada prezident Federal Məclisin deputatları və federal əyalətlərin nümayəndələrindən ibarət Federal Konvent tərəfindən seçilir.
Hazırkı prezident Frank-Valter Ştaynmayerin səlahiyyət müddətinin başa çatması ilə əlaqədar keçiriləcək seçkilərdə CSU siyasətçisi İlze Ayqner də namizəddir. Onun namizədliyini CDU/CSU, SPD və Yaşıllar dəstəkləyir.
14:40 16.11.2026
Oxunuş sayı: 122