21 gün qaydası: Vərdişlərimizi dəyişməyin sirri - ARAŞDIRMA
Həyatımız bir sıra rutinlərdən ibarətdir. Bu rutinlərə yenilərini əlavə etmək, yeni vərdişlər qazanmaq həyatımızı daha rəngarəng və maraqlı edə bilər. Beləliklə, monotonluqdan uzaqlaşaraq, daha zəngin və motivasiyalı bir yaşama sahib ola bilərik. Yeni vərdişlər qazanmaq bizə fərqli təcrübələr yaşatmaqla yanaşı inkişaf etməyimizə və özümüzü daha yaxşı tanımağa kömək edir. Həyatınıza kiçik, amma əhəmiyyətli dəyişikliklər edərək daha məmnun və dinamik bir yaşam tərzi əldə edə bilərsiniz. Bu zaman 21 gün qaydası sizin dadınıza yetəcək.
Bəs 21 gün qaydası nədir ?
21 gün qaydası yeni vərdişlər qazanmaq və ya mövcud davranışları dəyişmək üçün müəyyən bir müddətin lazım olduğunu irəli sürən metodik yanaşmadır.
Bu yanaşma Maxvell Maltz tərəfindən ortaya atılıb. Plastik cərrahiyyə əməliyyatı keçirmiş xəstələrinin yeni görünüşlərinə öyrəşmələri üçün təxminən 21 gün tələb etdiyini müşahidə edən Maltz bu müddətin yalnız görünüşlə məhdudlaşmayaraq, ümumi davranış dəyişikliklərinə də tətbiq oluna biləcəyini analiz edib.
21 gün qaydasını necə tətbiq edə bilərik?
Bunu həyata keçirmək üçün ilk addım olaraq məqsədinizi dəqiq müəyyənləşdirmək lazımdır. Əlçatan və ölçüləbilən hədəflər təyin etmək prosesin daha effektiv olmasını təmin edir. Kiçik addımlarla başlamaq vacibdir, çünki böyük dəyişikliklər adətən bir anda baş vermir, əksinə, kiçik və davamlı addımların toplusu nəticəsində meydana gəlir. Gündəlik olaraq yeni davranışı təkrarlamaq və onu həyatınıza daxil etmək, 21 gün ərzində davamlılıq göstərmək, məqsədinizə çatmaq üçün əsas prinsiplərdən biridir.
Bu müddət ərzində motivasiyanızı yüksək tutmaq və qarşıya qoyulan məqsədi yadda saxlamaq mühüm rol oynayır. Praktikada dəstək sistemi qurmaq da faydalıdır. Dostlarınız və ailə üzvlərinizin motivasiya verən yardımı ilə proses daha asan olacaqdır. Müddətin sonunda əldə olunan nəticələri dəyərləndirmək vərdişlərin formalaşması prosesində nəyin yaxşı işlədiyini və nəyin təkmilləşdirilməli olduğunu müəyyənləşdirmək üçün vacibdir.
Ümumilikdə, 21 gün qaydası yeni davranışlar qazanmaq və ya köhnə vərdişləri dəyişmək üçün dəyərli bir strategiyadır. Əsas olan məqsədə sadiq qalmaq və bu müddət ərzində davamlılıq göstərməkdir.
Nəzrin Salmanova
10:15 09.01.2025
Oxunuş sayı: 61207
