Rusiyanın “kölgə donanması”na məxsus tankerə hücum edilib
Rusiyanın “kölgə donanması”na aid olduğu bildirilən “LOUISE 1” neft tankeri Hörmüz boğazında hücuma məruz qalıb. Partlayışlar nəticəsində gəmidə yanğın baş verib.
Crossmedia.az xəbər verir ki, “Reuters” agentliyi dəniz təhlükəsizliyi mənbələrinə istinadən bu barədə məlumat yayıb.
Bildirilib ki, hadisə oktyabrın 29-da Omanın Xasab şəhərindən 25 dəniz mili (təxminən 46 kilometr) şimal-şərqdə qeydə alınıb.
Məlumata görə, kiçik kater tankerə yaxınlaşaraq onun sol bortuna iki maqnit minası yerləşdirib.
Partlayışlar nəticəsində gəminin mühərrik bölməsində yanğın başlayıb və tanker müvəqqəti olaraq hərəkətini dayandırıb.
Yanğın sonradan söndürülüb və gəmi hərəkətini bərpa edib. Hadisə nəticəsində ətraf mühitə ziyan dəymədiyi bildirilib.
Tankerin göyərtəsində olan 27 nəfərlik heyətin hamısı Hindistan vətəndaşıdır. Onlardan heç biri xəsarət almayıb.
Qeyd edək ki, Panama bayrağı altında üzən “LOUISE 1” tankeri daha əvvəl də hücuma məruz qalıb.
2026-cı ilin iyulunda Ukrayna qüvvələri Qara dənizdə həmin gəmini dəniz dronları ilə hədəfə alıblar. Kiyev tankerin Rusiya neftinin daşınmasında və sanksiyalardan yayınmada istifadə olunan “kölgə donanması”na aid olduğunu bildirib.
Hörmüz boğazında baş verən son hücumun məsuliyyətini isə hələlik heç bir tərəf üzərinə götürməyib.
10:17 03.11.2026
Oxunuş sayı: 62
