Yeni və təhlükəli virus gəlir: sərt karantin olacaq?
"Metapnevmovirus artıq Qazaxıstanda, hətta bu gün Qırğızıstanda da qeydə alınıb".
Bu sözləri Crossmedia.az-a açıqlamasında infeksionist Vasif Əliyev deyib. Həkimin sözlərinə görə, bu virus Paramyxoviridae ailəsinə aid bir virusdur. İlk dəfə 2001-ci ildə Hollandiyada aşkar olunub:
"Yuxarı və aşağı tənəffüs yolları infeksiyalarına, hətta pnevmoniyaya səbəb ola bilir. Hava-damcı yolu ilə yoluxur. Virusun 5-9 günlük inkubasiya dövrü olduğu bildirilir. Uşaqlar, körpələr, immunosupressiv dərmanlardan istifadə edən xəstələr, xroniki xəstəlikləri olanlar, həmçinin böyrək, qaraciyər, ağciyər və ya ürək çatışmazlığı olan şəxslər xəstəliyi daha ağır keçirə bilərlər.
Əsas əlamətləri öskürək, burun axıntısı, nəfəs darlığı, yüksək hərarətdir. Təbii ki, bu əlamətlər digər viruslarda da görülə bilər. Buna görə yalnız sadalanan simptomlara əsasən bu virusu müəyyən etmək çətindir. Bu fərqləndirmə üçün mütləq burundan yaxma alınmalı və respirator panel üzərindən müayinə aparılmalıdır. Burundan götürülən yaxma vasitəsilə virusun dəqiq olaraq hansı törədicidən qaynaqlandığını müəyyən etmək mümkündür.
Xüsusilə uşaqlarda, xroniki xəstəliyi olanlarda və immunosupressiv xəstələrdə virus daha ağır keçir. Bu qruplarda ölüm riski daha yüksək ola bilər. Lakin sağlam insanlar və uşaqlıqda bu virusu keçirənlər qoruyucu antitelə sahib olduqları üçün xəstəliyi daha yüngül keçirirlər".
Həmçinin həkim qeyd etdi ki, hazırda bu virusa qarşı dəqiq antiviral müalicə mövcud deyil:
"Eyni zamanda bunun üzərində araşdırmalar davam edir, amma konkret olaraq təsdiqlənmiş hər hansı peyvənd yoxdur. Ən doğru yanaşma isə simptomatik müalicədir. Buna görə də xəstə olan insanlardan uzaq durmaq, mövsümə uyğun geyinmək, sağlam qidalanmaq yalnız bu virusdan deyil, digər viruslardan da qoruyacaq. Həmçinin ara məsafəsinin gözlənilməsi və maska istifadəsi də COVID dövründə alışdığımız tədbirləri yenidən gündəmə gətirə bilər. Xəstə insanlara əsas tövsiyə budur ki, ümumiyyətlə ev şəraitində qalsınlar. Çünki birinci növbədə xəstə insanların izolyasiyası ən doğru addım olar. Bu insanlar çox sürətli şəkildə digər insanlara virus ötürə bilərlər. Hətta unutmayaq ki, uşaqlar sağaldıqdan sonra belə virus daşıyıcı ola bilərlər. Bu baxımdan sağalan insanlar da mütləq nəzarətdə saxlanmalıdır. Ümumiyyətlə, xəstəlik zamanı antibiotiklər, steroidlər və ya digər lazımsız müdaxilələrdən uzaq durmaq vacibdir. Çünki bunlar xəstəliyin daha da ağırlaşmasına səbəb ola bilər. Son olaraq simptomatik müalicə, bol maye qəbulu və istirahət rejimi ən doğru seçim olacaqdır".
Elnurə Kərimova
12:40 06.01.2025
Oxunuş sayı: 10822
