Rubio: Rusiya-Ukrayna münaqişəsinin sülh yolu ilə həlli görünmür
Hazırda Rusiya ilə Ukrayna arasında münaqişənin sülh danışıqları yolu ilə həllinə dair perspektiv görünmür.
Crossmedia.az xəbər verir ki, “RIA Novosti” bu barədə məlumat yayıb.
ABŞ dövlət katibi Marko Rubio bildirib ki, Vaşinqton münaqişənin danışıqlar yolu ilə həllinə nail olmaq üçün mümkün olan istənilən rolu oynamağa hazırdır.
Onun sözlərinə görə, ABŞ artıq vasitəçi kimi çıxış etməyə çalışıb, lakin indiyədək bu cəhdlər nəticə verməyib.
Oktyabrın 6-da ABŞ Prezidenti Donald Tramp Merilend ştatında keçirilən tədbirdə Ukrayna münaqişəsinin həlli üzərində işləməyə davam etdiyini bildirib. O, böhranın həllinin “kifayət qədər tez” baş verməli olduğunu deyib.
Ötən həftə Rusiya Prezidenti Vladimir Putin Moskvanın Kiyevlə hərbi qarşıdurmanı mümkün qədər tez dayandırmaq istədiyini açıqlayıb. O qeyd edib ki, Rusiya böhranı sülh danışıqları yolu ilə həll etməyə çalışır və Moskvanı dialoqda iştirak etmək istəməməkdə ittiham etməyin düzgün olmadığını vurğulayıb.
Putin həmçinin Ukrayna hakimiyyətini və Avropadakı tərəfdaşlarını qərar qəbul edərkən “yerdə formalaşan reallıqları” nəzərə almağa çağırıb.
Bundan əvvəl Ukraynada Rusiya ilə danışıqların aparılması ilə bağlı plan hazırlanıb.
11:20 08.10.2026
Oxunuş sayı: 58
