Spirtli içkilərin insan orqanizminə hansı faydaları var?
Spirtli içkilərin sağlamlığa faydalı olduğu barədə fikirlər uzun illərdir müzakirə olunur. Xüsusilə az miqdarda qırmızı şərabın ürək-damar sistemi üçün faydalı olduğu iddia edilirdi. Lakin yeni elmi yanaşmalar bu fikrin etibarlılığına ciddi şübhələr yaradıb. Alkoqolun tərkibindəki etanol orqanizm üçün toksik və kanserogen maddə hesab olunur. Hətta az miqdarda qəbulun belə bəzi xərçəng növlərinin riskini artıra biləcəyi bildirilir. Daha çox alkoqol qəbulu isə qaraciyər xəstəlikləri, ürək-damar problemləri, insult və asılılıq riskini yüksəldir. Bəs sağlamlıq naminə spirtli içki qəbul etmək üçün həqiqətən təhlükəsiz miqdar varmı?
Mövzu ilə bağlı terapevt Zakir Quliyev Crossmedia.az-a açıqlamasında bildirib ki, spirtli içkilərin sağlamlıq üçün sübut olunmuş, risksiz faydası yoxdur: “Spirtli içkilərin sağlamlıq üçün sübut olunmuş, risksiz faydası yoxdur və tibbi baxımdan tam təhlükəsiz miqdar müəyyən edilməyib. Keçmiş müşahidə tədqiqatlarında az miqdarda, xüsusən qırmızı şərab içənlərdə ürək-damar xəstəliklərinin daha az olduğu görünsə də, bunun alkoqoldan deyil, həmin insanların qidalanması, gəliri, fiziki aktivliyi və digər həyat tərzi xüsusiyyətlərindən qaynaqlana biləcəyi məlum olub. Etanol toksik, asılılıq yarada bilən və kanserogen maddədir. Hətta az qəbul edildikdə belə döş, bağırsaq, qaraciyər, ağız-boğaz və qida borusu xərçənglərinin riskini artıra bilər. Daha çox və ya bir dəfəyə çox içmək isə qaraciyər xəstəliyi, yüksək təzyiq, ürək ritm pozuntuları, insult, psixi problemlər, travma və asılılıq riskini xeyli yüksəldir. Buna görə içməyən insana sağlamlıq məqsədilə içməyə başlamaq tövsiyə edilmir. İçənlər üçün əsas prinsip “nə qədər az, bir o qədər təhlükəsiz”dir, amma “az riskli” ifadəsi “risksiz” demək deyil.
Həkim qeyd edib ki, hamiləlikdə, avtomobil idarə etməzdən əvvəl, bəzi xəstəliklər və dərmanlarla birlikdə, eləcə də asılılıq keçmişi olduqda ümumiyyətlə içilməməlidir. Ürək üçün ehtimal edilən faydaları isə idman, balanslı qidalanma, siqaret çəkməmək və təzyiqə nəzarət kimi risksiz üsullarla əldə etmək mümkündür”.
Zeynəb Həsən
16:30 10.09.2026
Oxunuş sayı: 50
