Cənubi Koreya təyyarə qəzasından sonra bütün Boeing 737-800-ləri yoxlayacaq
Cənubi Koreya hökuməti dekabrın 29-da Muan beynəlxalq hava limanında "Jeju Air" şirkətinə məxsus təyyarənin qəzaya uğramasından sonra ölkədəki bütün Boeing 737-800 təyyarələrini yoxlayacaq.
Crossmedia.az "TASS"-a istinadən xəbər verir ki, qəza, təyyarədə olan 181 nəfərdən 179-nun həyatına son qoyub. Bu Cənubi Koreya tarixində ən ölümcül təyyarə qəzası olub.Ölkədə bir həftəlik matəm elan edilib. Sağ qalan iki nəfər isə ekipaj üzvləridir.
İlkin məlumatlara görə, qəzaya quşlarla toqquşma nəticəsində eniş şassisinin nasazlığı səbəb olub.
Təyyarə eniş etməyə cəhd etsə də, əlavə dövrə vurmağa məcbur olub. Şahidlər təyyarənin hələ havada ikən mühərrikin alovlandığını bildiriblər.
Ekipaj təyyarəni gövdəsinə endirməyə cəhd edib, lakin təyyarə sürəti azalda bilməyib və uçuş-enmə zolağının sonundakı binaya çırpılıb. Nəticədə partlayış və yanğın baş verib.
Yonhap mənbələri xəbər verir ki, bazar ertəsi başqa bir "Jeju Air" təyyarəsi eniş şassisindəki problem səbəbindən uçuş hava limanına qayıdıb.
Tərlan Əmrahova
06:45 31.12.2024
Oxunuş sayı: 9981
