Hindistan iqtisadiyyatı rekord qırıb
Hindistan iqtisadiyyatı 2026-27 mali ilinin aprel-iyun aylarını əhatə edən ilk rübündə 7,8% böyüyüb.
Crossmedia.az bu barədə xarici mediaya istinadən xəbər verir.
Bu göstərici iqtisadçıların təxmin etdiyi 7,1%-lik artımdan xeyli yüksək olub.
Hökumətin məlumatına görə, yeni ÜDM seriyası üzrə ötən ilin eyni rübündə iqtisadi artım 6,9% təşkil edib. Beləliklə, son göstərici Hindistan iqtisadiyyatının qlobal qeyri-müəyyənliklərə baxmayaraq sürətini qoruduğunu göstərib.
Maliyyə naziri Nirmala Sitharaman bildirib ki, yüksək artım Hindistan xalqının əməyinin, Milli Demokratik Alyans hökumətinin islahatlarının və çevik iqtisadi idarəetmənin nəticəsidir.
İqtisadi artımın əsas dayaqları arasında daxili tələbat, dövlət kapital xərcləri, istehsal, tikinti və ixracın artımı olub. İstehlakın dayanıqlı qalması və dövlət investisiyaları da iqtisadi aktivliyi dəstəkləyib.
Qeyd edək ki, Hindistan iqtisadiyyatı 2025-26 mali ilinin yanvar-mart rübündə də 7,8% böyüyüb. Həmin mali il üzrə real ÜDM artımı isə ilkin hesablamalara əsasən 7,7% təşkil edib.
Bununla belə, ölkə iqtisadiyyatı üçün müəyyən risklər qalır. Xüsusilə neft qiymətlərinin yüksəlməsi Hindistan üçün ciddi problem yarada bilər. Ölkə xam neft tələbatının böyük hissəsini idxal etdiyindən enerji qiymətlərində uzunmüddətli artım inflyasiyanı və istehsal xərclərini yüksəldə bilər.
Qlobal ticarətdə qeyri-müəyyənlik və geosiyasi gərginliklər də ixraca və biznes investisiyalarına təsir göstərə bilər. Mütəxəssislər uzunmüddətli yüksək artımın qorunması üçün özəl investisiyaların artmasının vacib olduğunu bildirirlər.
18:19 31.08.2026
Oxunuş sayı: 42
