Pezeşkian: İran-Azərbaycan münasibətlərini yeni mərhələyə çıxarmaq mümkündür
İran Prezidenti Məsud Pezeşkian İran-Azərbaycan münasibətlərinin yeni səviyyəyə yüksəldilməsi və mühüm sazişlərin imzalanması üçün bütün şəraitin yarandığını bildirib.
Crossmedia.az xəbər verir ki, IRIB bu barədə məlumat yayıb.
Pezeşkianın sözlərinə görə, İranın Azərbaycan, Səudiyyə Ərəbistanı, Türkiyə, BƏƏ, Qətər, Oman, Misir və Türkmənistanla münasibətlərinin yeni mərhələyə çıxarılması üçün imkanlar mövcuddur.
İran Prezidenti güc siyasətinin nəticə vermədiyini vurğulayıb. O bildirib ki, bir tərəf güc tətbiq etdikdə qarşı tərəf də eyni şəkildə cavab verir. Buna görə Tehran regionda dialoq və mehriban qonşuluq siyasətinə üstünlük verir.
Hörmüz boğazı ilə bağlı şərtlər
Pezeşkian ABŞ ilə münasibətlərdə Hörmüz boğazı ətrafında yaranmış gərginliyə də toxunub.
O bildirib ki, ABŞ İslamabad memorandumunda üzərinə götürdüyü öhdəlikləri yerinə yetirərsə, İran Hörmüz boğazını gəmiçilik üçün açmağa hazırdır.
Bunun üçün Vaşinqtonun dəniz blokadasını dayandırmalı, sanksiyaları ləğv etməli və İrana məxsus dondurulmuş vəsaitləri blokdan çıxarmalı olduğunu deyib.
Regional sabitlik
İran Prezidenti regional sabitliyin təmin olunması üçün İsrailin Livana hücumlarının da dayandırılmasının vacibliyini qeyd edib.
Pezeşkianın sözlərinə görə, Omanla əldə olunmuş razılaşmalara əsasən, gəmiçiliyin bərpası yalnız İranın müəyyən etdiyi tənzimləmə mexanizmi çərçivəsində mümkündür.
09:51 29.08.2026
Oxunuş sayı: 64
