Səhiyyə

Quba xəstəxanasında yeni şöbələr açılıb

TƏBİB, Hemofiliyalı Xəstələrin Respublika Assosiasiyası, Novo Nordisk Hemofiliya Fondunun dəstəyi ilə Quba Rayon Mərkəzi Xəstəxanasında yeni Fizioterapevtik və Reabilitasiya kabinetlərinin açılışı olub.

Açılış mərasimində TƏBİB-in İcraçı direktorunun müavini Anar İsrafilov, İcraçı direktorun müşaviri Pərvin Əkbərov, İxtisaslı tibbi xidmətlərin təşkili şöbəsinin müdiri Vüsal Yusifov, Quba Rayon Mərkəzi Xəstəxanasının direktoru Əliyar Sərvərov, Hemofiliyalı Xəstələrin Respublika Assosiasiyasının sədri Ayaz Hüseynov və b. iştirak edib.

Crossmedia.az xəbər verir ki, xəstəxanada həyata keçirilən yeniliklər, Fizioterapiya şöbəsinin fəaliyyəti və yaradılan şəraitlə bağlı məlumat verən Əliyar Sərvərov bildirib ki, bu yeniliklər sayəsində göstərilən tibbi xidmətin keyfiyyəti yüksəldiləcək və vətəndaş məmnunluğu daha da artırılacaq.

Yeni şöbə tibbi reabilitasiya cihazları, amplipuls, ultrasəs və digər müasir fizioterapiya aparatları da daxil olmaqla, bütün zəruri tibbi avadanlıqlarla təmin edilib. 2 həkim 3 tibb bacısından ibarət tibbi heyətin xidmət göstərəcəyi şöbə eyni zamanda 8 pasiyent qəbul etmək potensialındadır.

Yeni Şüa-diaqnostika şöbəsində 4 həkim, 4 radioloji texnik olmaqla, ümumilikdə 15 nəfər tibbi heyət xidmət göstərəcək.

Həmçinin şöbədə 4 həkim otağı, gözləmə zalı və qeydiyyat bölməsi də yerləşir.

loader