Bu ev tamamilə pulsuzdur, amma bir şərtlə
Yaponiyada 1930-cu ildə inşa edilmiş ənənəvi ev və təxminən 2 hektar torpaq sahəsi pulsuz olaraq yeni sahibinə təklif edilir.
Crossmedia.az xəbər verir ki, bu barədə Yaponiyada köhnə evlərin alıcılarını axtaran ˝OldHouses˝Japan resursu məlumat yayıb.
Söhbət Yaponiyada akiya adlandırılan boş evlərdən gedir. Bunlar sahiblərinin köçdüyü və ya vəfat etdiyi, varislərinin isə baxmaq istəmədiyi və ya buna imkanı olmadığı yaşayış evləridir.
Təklif olunan ərazinin sahəsi 20 969 kvadratmetrdir. Burada taxta evlə yanaşı, gil anbar, zirzəmi və şəxsi şabalıd bağı da yerləşir.
Evin daxilində ənənəvi yapon planlaşdırılması qorunub. Evdə beş otaq, mətbəx və yemək otağı var. Əvvəlki sahib binanı işlək vəziyyətdə saxlayıb, dam örtüyünü mütəmadi təmir edib və ərazinin enerji təminatını yaxşılaşdırmaq üçün günəş panelləri quraşdırıb.
Bununla belə, yeni sahib su təchizatı sisteminin təmiri ilə məşğul olmalı olacaq. Sistem köhnəlib və texniki xidmət tələb edir. Qış aylarında isə güclü qar səbəbindən borulara çıxış daha da çətinləşə bilər.
Evin pulsuz verilməsinin əsas şərti
Yaponiyada bu cür daşınmaz əmlakın pulsuz və ya simvolik qiymətə verilməsi hökumətin ölkədəki boş evlərin sayını azaltmaq strategiyasının bir hissəsidir.
Əsas şərt isə yeni sahibin evdə faktiki yaşamasıdır. Əmlak investisiya və ya bağ evi kimi istifadə edilə bilməz.
Bundan əlavə, yeni sahib hər il 9500 yen məbləğində əmlak vergisi ödəməlidir.
Məlumatlara görə, Yaponiyada bir neçə milyon boş ev var. Bu problemin xüsusilə Tokio və Kioto kimi şəhərlərdə geniş yayıldığı bildirilir.
02:36 25.08.2026
Oxunuş sayı: 46
