Xarici xəbərlər

İranda hicabla bağlı sərt çağırışlar yenidən səslənir

İranda müharibə və iqtisadi böhran fonunda qadınların hicab taxması ilə bağlı müzakirələr yenidən gündəmə gəlib.

Crossmedia.az CNN-ə istinadən xəbər verir ki, son aylarda bir çox iranlı qadın məcburi hicab qaydalarına əməl etmir. Müharibənin ən gərgin dövründə isə hicabsız qadınların hətta dövlət tədbirlərində və dövlət mediasında görünməsi diqqət çəkib.

Lakin son həftələrdə ölkənin sərt xətt tərəfdarları hicab qaydalarının daha ciddi tətbiq edilməsini tələb etməyə başlayıblar. Tehran və digər şəhərlərdə bəzi kafe, restoran və mağazaların geyim qaydalarına əməl etmədikləri üçün bağlandığı bildirilir.

İran hakimiyyəti isə hələlik genişmiqyaslı repressiv kampaniyaya getməkdən çəkinir. Buna səbəb ölkənin müharibə, iqtisadi çətinliklər və təhlükəsizlik sistemində yenidənqurma kimi daha ciddi problemlərlə üzləşməsi göstərilir.

Məsələ ilə bağlı ölkə daxilində də fərqli mövqelər səslənir. Prezident Məsud Pezeşkian hicab məsələsinin qanunla deyil, mədəni yanaşma ilə həll edilməli olduğunu bildirib.

Məlumata görə, 2022-ci ildə Məhsa Əmininin polis nəzarətində ölümündən sonra başlayan “Qadın, Həyat, Azadlıq” etirazları sərt şəkildə yatırılıb. Buna baxmayaraq, xüsusilə gənc qadınlar arasında məcburi hicab qaydalarına açıq etiraz davam edir.

Mövzular:

İran hicab qadınlar Tehran islam müharibə Pezeşkian

🖨 Çap et

09:47 23.08.2026

Oxunuş sayı: 64