Bu vitamin sümüklərin “gizli dayağı” ola bilər – Alimlərdən mühüm açıqlama
Vitamin K-nın aktivliyi sümüklərin möhkəmliyi və daxili quruluşunun daha yaxşı olması ilə əlaqələndirilib.
Crossmedia.az xəbər verir ki, Nutrients jurnalı bu barədə məlumat yayıb.
Avstraliyalı alimlər bud-çanaq nahiyəsində əməliyyat keçirən 108 pasiyentin məlumatlarını təhlil ediblər. Araşdırmada bud sümüyünün boyun hissəsinin sınığı olan və olmayan şəxslər də iştirak edib.
Tədqiqatçılar iştirakçıların qanındakı K, D, C və E vitaminləri, B qrupu vitaminləri, sink və digər qida maddələrinin göstəricilərini qiymətləndirib, eyni zamanda sümük toxumasının vəziyyətini ətraflı araşdırıblar.
Ən nəzərəçarpan əlaqə vitamin K ilə müəyyən edilib. Bu vitaminin aktivliyi onun iştirakı ilə funksional xüsusiyyət qazanan osteokalsin zülalının vəziyyəti ilə əlaqələndirilib.
Aktiv osteokalsinin daha yüksək səviyyəsi bud sümüyünün daha möhkəm olması, sümük toxumasının xarici qatının daha qalın və daxili strukturunun daha sıx olması ilə əlaqəli olub.
Əksinə, osteokalsinin qeyri-aktiv formalarına sümük kövrəkliyi əlamətləri müşahidə olunan insanlarda daha çox rast gəlinib.
Alimlərin fikrincə, bunun səbəblərindən biri vitamin K-nın sümük toxumasının minerallaşmasında iştirak etməsidir. Vitamin osteokalsinin kalsiumu bağlamasına və onun sümük strukturuna daxil olmasına kömək edir.
Bununla belə, tədqiqat yalnız əlaqəni göstərir və vitamin K əlavələrinin qəbulunun öz-özlüyündə sınıqların qarşısını aldığını sübut etmir. Bu təsirin təsdiqlənməsi üçün əlavə araşdırmalara ehtiyac var.
Qeyd edək ki, vitamin K-nın osteokalsinin aktivləşməsindəki rolu və sümük sağlamlığı ilə əlaqəsi əvvəlki tədqiqatlarda da araşdırılıb.
01:27 19.08.2026
Oxunuş sayı: 53
