“Könüllülər Koalisiyası” Parisdə Ukraynanın təhlükəsizliyini müzakirə edəcək
Parisdə bazar ertəsi “Könüllülər Koalisiyası”nın Ukraynanın təhlükəsizliyinə həsr olunmuş sammiti keçiriləcək.
Crossmedia.az xəbər verir ki, bu barədə xarici KİV məlumat yayıb.
Məlumata görə, toplantıda 25 dövlət və hökumət başçısı, həmçinin NATO və Avropa İttifaqının rəhbərləri iştirak edəcəklər. Sammit Bastiliyanın alınması gününə həsr olunmuş hərbi paraddan bir gün əvvəl Əlillər Evində (Hôtel des Invalides) keçiriləcək. Tədbirdə Ukrayna Prezidenti Volodimir Zelenskinin də iştirakı gözlənilir. Həmçinin Moldova və Şimali Makedoniyanın 37 ölkəni birləşdirən koalisiyaya rəsmi qoşulacağı bildirilir.
Sammitin əsas məqsədi Kiyevə dəstəyin davam etdiyini nümayiş etdirmək və Qərb tərəfdaşlarının fəaliyyətini əlaqələndirməkdir. Gündəlikdə Ukraynanın hərbi ehtiyacları üçün bu il ayrılması nəzərdə tutulan 70 milyard avroluq maliyyə öhdəliyinin icrası da yer alır.
Liderlər hava hücumundan müdafiənin gücləndirilməsi, Ukraynada "Patriot" raketlərinin istehsalının təşkili və Avropa texnologiyalarına əsaslanan yeni raketdən müdafiə sisteminin yaradılması məsələlərini də müzakirə edəcəklər. Bundan başqa, Ukrayna üçün təhlükəsizlik təminatları, o cümlədən çoxtərəfli hərbi qüvvələrin mümkün iştirakı və ikitərəfli hüquqi sazişlər nəzərdən keçiriləcək.
Sammitdən sonra xarici qonaqlar Yelisey çöllərində keçiriləcək ənənəvi Bastiliya Günü hərbi paradına qatılacaqlar. Bildirilir ki, bu il paradın ön sıralarında “Könüllülər Koalisiyası”na üzv ölkələrin 500-dən çox hərbçisi yürüş edəcək.
17:31 12.07.2026
Oxunuş sayı: 57
