KİV: Keçmiş general Netanyahuya əsas rəqibə çevrilir
İsrailin keçmiş Baş Qərargah rəisi Qadi Ayzenkot qarşıdan gələn parlament seçkilərində Baş nazir Benyamin Netanyahunun əsas rəqiblərindən birinə çevrilib.
Crossmedia.az xəbər verir ki, bu barədə The Wall Street Journal (WSJ) məlumat yayıb.
Nəşrin yazdığına görə, Ayzenkotun rəhbərlik etdiyi mərkəzçi Yashar partiyasının reytinqi sürətlə yüksəlir və sorğulara əsasən, hakim Likud partiyasının dəstək səviyyəsinə yaxınlaşıb. İsraildə parlament seçkilərinin oktyabrın sonunadək keçirilməsi gözlənilir.
Qadi Ayzenkot 2023-cü il oktyabrın 7-də HƏMAS-ın hücumundan sonra yaradılan milli birlik hökumətinə qoşulsa da, sonradan Benyamin Netanyahunu müharibəni uzatmaqda və girovların həyatını riskə atmaqda ittiham edərək istefa verib.
WSJ qeyd edir ki, Ayzenkotun oğlu və iki qardaşı oğlunun Qəzza zolağında həlak olması seçicilər arasında ona olan etimadı daha da artırıb.
Bununla yanaşı, nəşr vurğulayır ki, Benyamin Netanyahu hələ də təcrübəli siyasi fiqur olaraq qalır. Lakin son sorğular onun təkbaşına hökumət qurmaq üçün kifayət qədər dəstəyə malik olmadığını göstərir. Analitiklərin fikrincə, Netanyahu müxalifətin koalisiya formalaşdırmasının qarşısını almağa çalışaraq hakimiyyəti müvəqqəti hökumət vasitəsilə qorumağa cəhd edə bilər.
18:12 06.07.2026
Oxunuş sayı: 45
