Təhsil sistemində bu yeni qayda ümumi göstəricilərə müsbət təsir edəcək
Texnologiyanın inkişafı ən çox uşaqları maraqlandırır. Artıq hər bir uşaöın əlində bir telefon, telefonun içində başqa bir həyatı var. Bu telefonlardan mütəmadi istifadə məktəblərdə dərs prosesinə mane olur, diqqət yayındırır.Buna görə də məktəblərdə şagirdlərin mobil telefonlardan istifadəsinin qadağan edilməsi olduqca düzgün qərar hesab olunur. Ekspertlər hesab edirlər ki, bu addım şagirdlərin diqqətinin dərsə yönəlməsinə və tədris keyfiyyətinin yüksəlməsinə müsbət təsir göstərəcək.
Mövzu ilə bağlı Crossmedia.az-a danışan təhsil eksperti Elçin Əfəndiyev bildirib ki, belə bir qərarın qəbul edilməsi vacib idi: "Son dövrlər şagirdlərin dərs zamanı mobil telefondan istifadə etməsi onların diqqətini yayındırır və nəticədə təhsil göstəriciləri aşağı düşür. Bu təcrübə artıq dünyanın təhsil göstəriciləri yüksək olan bir sıra ölkələrində, eləcə də MDB məkanında və bəzi türkdilli dövlətlərdə tətbiq edilir".
E.Əfəndiyev vurğulayıb ki, yeni tədris ilindən etibarən şagirdlər auditoriyada mobil telefonlardan, eləcə də ağıllı saat və planşet kimi digər elektron cihazlardan istifadə edə bilməyəcəklər: "Yalnız zəruri hallarda məktəbin öz avadanlıqları – kompüter, proyektor və digər texniki vasitələr müəllim tərəfindən idarə olunmaqla tədris prosesində istifadə edilə bilər. Şagirdlərin özlərinin daşıdıqları elektron avadanlıqlardan istifadənin məhdudlaşdırılması təhsil göstəricilərinin artmasına rəvac verəcək qərardır."
Zeynəb Həsən
12:00 01.07.2026
Oxunuş sayı: 49
