Daşkənd Dövlət Tibb Universiteti Bakıda əməkdaşlıq müqaviləsi imzalayıb
23 mayda Bakıda keçirilən Özbəkistan Ali Təhsil Müəssisələrinin III Təhsil Sərgisində iştirak edən qardaş ölkənin universitetləri əməkdaşlıq müqavilələri imzalayıblar.
Crossmedia.az xəbər verir ki, müqavilə sərginin təşkilatçısı olan Ingla İnternational ETC-dən İcraçı direktor Aytən Məmmədli Özbəkistan tərəfdən isə Daşkənd Dövlət Tibb Universitetinin Beynəlxalq Fakültənin Dekanı Cahongir Tursunov arasında imzalanıb.
Xatırladaq ki, imzalanmış əməkdaşlıq müqavilələri tərəflərin təhsil sahəsində birgə fəaliyyətini, xüsusilə də tələbələrin seçimi, qəbulu və təhsil imkanlarının təşkili istiqamətində əməkdaşlığını əhatə edir.
Müqaviləyə əsasən, şirkət universitetə potensial namizədləri təqdim edir, onların akademik göstəricilərinə və qəbul meyarlarına uyğunluğuna zəmanət verir, universitet isə həmin tələbələrin qəbul prosesini daxili qaydalara uyğun şəkildə həyata keçirir. Sənəddə həm təqaüdlü, həm də ödənişli əsaslarla ayrılan yerlər, maliyyə məsuliyyəti və təhsil xərclərinin qarşılanması məsələləri ayrıca göstərilib. Eyni zamanda universitetin şirkətlə eksklüziv əməkdaşlıq şərtləri də müqavilədə öz əksini tapır.
Qeyd edək ki, müqavilə tərəflərin etik normalara, qəbul siyasətinə və tələbələrin şəxsi məlumatlarının məxfiliyinə riayət etməsini nəzərdə tutur, yaranacaq mübahisələrin isə qarşılıqlı danışıqlar yolu ilə həll ediləcəyini müəyyən edir.
Ümumilikdə sənəd universitetlə beynəlxalq təhsil şirkəti arasında tələbələrin xarici ali təhsil imkanlarına çıxışını tənzimləyən, hüquqi və təşkilati öhdəlikləri müəyyən edən rəsmi əməkdaşlıq çərçivəsi kimi çıxış edir.
1920-ci ildə əsası qoyulan Daşkənd Dövlət Tibb Universiteti Mərkəzi Asiyanın ən nüfuzlu ali tibb təhsil müəssisələrindən biri hesab olunur. Universitet yalnız Özbəkistanda deyil, beynəlxalq səviyyədə də tanınaraq minlərlə yerli və xarici tələbəyə müasir tibb təhsili təqdim edir. Burada müalicə işi, stomatologiya, pediatriya, əczaçılıq və ictimai səhiyyə kimi istiqamətlər üzrə yüksək ixtisaslı kadrlar hazırlanır. Universitetin diqqətçəkən xüsusiyyətlərindən biri isə beynəlxalq əməkdaşlıqlara xüsusi önəm verməsidir.
Müasir laboratoriyalar, innovativ tibbi texnologiyalar və elmi araşdırmalar universiteti regionun aparıcı tibb mərkəzlərindən birinə çevirir.
Elmir Heydərli
13:38 26.05.2026
Oxunuş sayı: 53
