Xarici xəbərlər

Hörmüz boğazı bağlana bilər

İran parlamentinin spikeri Məhəmməd Baqir Qalibaf ABŞ-nin siyasətini kəskin tənqid edərək bir sıra iddialar səsləndirib. O, ABŞ Prezidenti Donald Tramp tərəfindən irəli sürülən bəyanatların tamamilə yalan olduğunu bildirib.

Crossmedia.az xarici mediyaya istinadən xəbər verir.

Qalibafın sözlərinə görə, ABŞ-nin İrana qarşı blokadası davam edərsə, strateji əhəmiyyətə malik Hörmüz boğazı bağlana bilər. O qeyd edib ki, bu halda boğazdan keçid yalnız İranın müəyyən etdiyi marşrutlar və icazələr əsasında həyata keçiriləcək.

İran rəsmisi əlavə edib ki, boğazın açıq və ya bağlı olması ilə bağlı qərarlar sosial mediada deyil, real şəraitdə qəbul olunur.

Qalibaf həmçinin informasiya müharibəsinin davam etdiyini vurğulayaraq bildirib ki, ictimai rəyin manipulyasiyası müasir münaqişələrin əsas elementlərindən biridir. Onun sözlərinə görə, İran xalqı bu cür təsirlərə uymayacaq.

Sonda o, danışıqların perspektivinə də toxunaraq, mövcud şəraitdə diplomatik proseslərin nəticə verməyəcəyini iddia edib.

🖨 Çap et

12:45 18.04.2026

Oxunuş sayı: 50