Xarici xəbərlər

Antalya Diplomatiya Forumunda İran–ABŞ dolayı danışıqları müzakirə olunur

Antalya Diplomatiya Forumu çərçivəsində İran–ABŞ arasında mümkün dolayı danışıqların gündəmə gətirildiyi bildirilib.

Crossmedia.az bu barədə türk mediasına istinadən xəbər verir.

İranın xarici işlər nazirinin müavini və Siyasi və Beynəlxalq Araşdırmalar İnstitutunun rəhbəri Səid Xətibzadə forumda rəsmi nümayəndə kimi iştirak edib. O, tədbir çərçivəsində keçirilən panel müzakirələrdə və yan görüşlərdə diplomatik təmaslar aparıb.

Forum “qlobal qeyri-müəyyənliklərin idarə olunması” mövzusu ilə keçirilib və əsas diqqət Yaxın Şərq, Körfəz regionu, eləcə də İran, ABŞ və İsrail arasında baş verən gərginliklərin nəticələrinə yönəlib.

Məlumata görə, Ankara forumdan İran və ABŞ arasında dolayı danışıqların davam etdirilməsi üçün platforma kimi istifadə olunmasına çalışıb. Bu çərçivədə Türkiyə, Misir, Pakistan və Səudiyyə Ərəbistanı xarici işlər nazirlərinin iştirakı ilə dördtərəfli görüşün də keçirilməsi planlaşdırılıb.

Xətibzadənin ikitərəfli görüşlərinin detalları açıqlanmasa da, onun Türkiyə rəsmiləri, ərəb ölkələrinin nümayəndələri və beynəlxalq təşkilatlarla regional sabitlik, Fələstin məsələsi və Hörmüz boğazında enerji təhlükəsizliyi mövzularını müzakirə etdiyi qeyd olunub. İran tərəfi bu platforma vasitəsilə diplomatik təmasları genişləndirməyə və gərginliyi azaltmağa çalışıb.

🖨 Çap et

12:30 18.04.2026

Oxunuş sayı: 64