Ermənistanda radikal müxalifət aksiyaları: Hakimiyyət dəyişikliyi real görünmür
Ermənistanda son dövrlərdə radikal müxalif qüvvələrin küçə etirazları və hakimiyyət dəyişikliyi çağırışları ölkədə müəyyən siyasi gərginlik fonunun mövcud olduğunu göstərsə də, bu proseslərin real siyasi nəticəyə çevrilməsi ehtimalı hazırkı mərhələdə yüksək qiymətləndirilmir.
Mövcud aksiyalar daha çox daxili siyasi mübarizənin elementləri kimi çıxış edir və geniş ictimai dəstək olmadan hakimiyyət dəyişikliyi yaratmaq potensialı məhduddur.
Mövzu ilə bağlı Crossmedia.az-a açıqlamasında politoloq Tofiq Abbasov bildirib ki, Ermənistanda narazı qüvvələrin sayının azalması artıq onu göstərir ki, indiki hakimiyyətin siyasəti müəyyən mənada cəmiyyət daxilində dəstək tapır.
Onun sözlərinə görə, azlıq təşkil edən revanşist və əvəz çıxmaq niyyəti ilə çıxış edən qruplar daha çox özlərini fəal şəkildə göstərməyə çalışırlar və eyni zamanda ölkədə ümumi sabitliyi pozmağa yönəlmiş addımlar atırlar:
"Bu qüvvələrin ən böyük problemi onların aydın və konkret fəaliyyət proqramının olmamasıdır. Onların əsas məqsədi hakimiyyətə mane olmaq və özlərini fəal siyasi qüvvə kimi təqdim etməkdir. Bununla guya Ermənistan hakimiyyətinin yürüdüyü kursun cəmiyyət tərəfindən qəbul edilmədiyini nümayiş etdirməyə çalışırlar".
Ekspertin fikrincə, Ermənistan müxalifətinin fəaliyyətində müəyyən pərakəndəlik açıq şəkildə müşahidə olunur. Onlar özlərini vahid və monolit siyasi qüvvə kimi təqdim etməyə çalışsalar da, bu cəhdlər real siyasi proqramın olmaması səbəbindən nəticə vermir.
Halbuki, konstruktiv müxalifət qüvvələri adətən alternativ inkişaf proqramı təqdim etməyə, yürüdülən siyasətin hansı səbəblərə görə yanlış olduğunu izah etməyə və fərqli yanaşmalar ortaya qoymağa çalışırlar.
T. Abbasov vurğulayıb ki, normal siyasi mübarizə şəraitində müxalifət iqtisadi və sosial sahələrdə konkret alternativlər təqdim etməli, hökumətin siyasətini tənqid etməklə yanaşı, yeni model və həll yolları irəli sürməlidir.
"Əgər hər hansı siyasi qüvvənin həqiqətən tutarlı proqramı varsa, o bunu ictimaiyyətə açıq şəkildə təqdim edir. Məqsəd isə cəmiyyətdə etimad qazanmaq və öz bacarığını nümayiş etdirməkdir", – deyə, o, əlavə edib.
Politoloqun sözlərinə görə, hazırda küçə yürüşlərinə çıxan qruplar daha çox marginal xarakter daşıyır. Onların cəmiyyət arasında ciddi sosial bazası yoxdur və özlərini qurucu siyasi qüvvə kimi təqdim edə bilmirlər.
"Hamıya məlumdur ki, söküb-dağıtmaq çox asandır. Lakin qurmaq və inkişaf etdirmək üçün real proqram və siyasi məsuliyyət lazımdır. Məhz bu amil siyasi qüvvəyə elektorat qazandırır", – politoloq qeyd edib.
T. Abbasov hesab edir ki, Ermənistan müxalifətinin aksiyaları daha çox kortəbii xarakter daşıyır və böyük siyasi nəticələrə gətirib çıxarmır. Onun fikrincə, bu aksiyalar daha çox effekt yaratmağa hesablanıb və praktiki olaraq mikro nəticələrdən o yana keçmir.
Politoloq əlavə edib ki, aksiyaların müəyyən mənada hakimiyyətə ünvanlanmış təzyiq vasitəsi kimi qiymətləndirilməsi mümkündür. Lakin belə hallarda sabitliyin qorunması və mümkün xaos cəhdlərinin qarşısının alınması birbaşa hakimiyyətin idarəetmə bacarığından asılıdır. Əgər hakimiyyət vəziyyəti nəzarətdə saxlaya bilməsə, bu artıq onun zəifliyinin göstəricisi kimi dəyərləndirilə bilər.
Ekspertin sözlərinə görə, Ermənistanda yaxın siyasi mərhələ üçün əsas hədəf 7 iyun tarixində keçirilməsi gözlənilən seçkilərdir. Hazırkı vəziyyətdə isə baş nazir Nikol Paşinyan və onun komandası radikal addımlar atmağa tələsmir və prosesləri daha sakit, mərhələli şəkildə idarə etməyə çalışır. Bu isə hakimiyyətin əsas siyasi resurslarını daha münasib məqamda istifadə etmək strategiyası ilə bağlıdır.
Tofiq Abbasovun fikrincə, Ermənistan daxilindəki siyasi gərginliyin Azərbaycanla münasibətlərə təsir etməsi ehtimalı əsasən mümkün siyasi hadisələrdən asılı olacaq. Əgər ciddi uğursuzluqlar baş versə və ya regionda vəziyyət dəyişsə, müxalif qüvvələr bundan istifadə etməyə çalışa bilərlər.
Bununla belə, hazırkı mərhələdə Ermənistanın Azərbaycanla bağlı siyasətində müəyyən kompromis və razılaşma meyilləri müşahidə olunur.
Politoloq qeyd edib ki, baş nazir Nikol Paşinyan bir neçə dəfə Azərbaycan Prezidenti İlham Əliyev ilə aparılan proseslərdə müsbət məqamları qeyd edib və bu istiqamətdə müəyyən təşəkkür ifadələri səsləndirib.
Ekspert hesab edir ki, mövcud şəraitdə Ermənistan hakimiyyəti Azərbaycanla münasibətlərdə yeni gərginlik yaratmaqda maraqlı görünmür. Bu isə müəyyən mənada müxalifətin hakimiyyətə yönəlmiş ittihamlarının təsir gücünü də azaldır.
Sonda politoloq vurğulayıb ki, Nikol Paşinyan hazırkı mərhələdə siyasi prosesləri kifayət qədər balanslı şəkildə idarə edir və müəyyən ehtiyat siyasi resurslara malikdir.
Onun fikrincə, əgər hakimiyyət ciddi səhvlərə yol verməzsə, Paşinyan komandası seçkilərə qədər mövqeyini qoruyub saxlaya və siyasi hədəflərinə çatmaq imkanını əldə edə bilər.
Nigar Yahyazadə
17:29 14.03.2026
Oxunuş sayı: 76
