Lavrov Qahirədə afrikalı həmkarları ilə intensiv diplomatik görüşlər keçirib
Rusiyanın xarici işlər naziri Sergey Lavrov Qahirədə baş tutan Rusiya–Afrika Tərəfdaşlıq Forumunun ikinci nazirlər konfransı çərçivəsində iki gün ərzində afrikalı həmkarları ilə 20-dən çox görüş keçirib. Bu barədə Rusiya Xarici İşlər Nazirliyi rəsmi məlumat yayıb.
Crossmedia.az xəbər verir ki,məlumata görə, Lavrov Konqo Respublikası, Burundi, Tanzaniya, Botsvana, Qambiya, Namibiya, Ekvatorial Qvineya, Toqo, Mavritaniya, Malavi, Seyşel adaları, Ruanda, Misir, Əlcəzair, Zimbabve, Tunis və Cənubi Sudanın xarici siyasət rəhbərləri, həmçinin Qərbi Afrika Dövlətlərinin İqtisadi Birliyi (ECOWAS) nümayəndələri ilə ikitərəfli danışıqlar aparıb.
Göüşlərdə Rusiya ilə Afrika ölkələri arasında siyasi dialoqun gücləndirilməsi, ticarət-iqtisadi əməkdaşlığın genişləndirilməsi, enerji, təhlükəsizlik, humanitar və təhsil sahələrində birgə layihələrin inkişafı müzakirə olunub. Tərəflər beynəlxalq və regional gündəmdə duran məsələlər üzrə də fikir mübadiləsi aparıblar.
Forumun əsas məqamlarından biri Sergey Lavrovun Misir Prezidenti Əbdülfəttah əs-Sisi ilə görüşü olub. Görüş zamanı Rusiya–Misir münasibətlərinin strateji tərəfdaşlıq səviyyəsində inkişafı və qarşılıqlı maraq doğuran regional proseslər ətrafında müzakirələr aparılıb.
Eyni zamanda, konfrans çərçivəsində Lavrov Misirin xarici işlər naziri Bədr Abdelatti ilə birgə mətbuat konfransı keçirib. Tərəflər forumun nəticələrini dəyərləndirərək Rusiya–Afrika əməkdaşlığının gələcək perspektivləri ilə bağlı açıqlamalar veriblər.
Nastya Qəniyeva
11:35 22.12.2025
Oxunuş sayı: 1062
