Ukrayna ətrafında mövcud vəziyyət dövlət çevrilişi ilə başlayıb - Putin
Rusiya Prezidenti Vladimir Putin “İlin yekunları” adlı tədbirdə çıxışı zamanı Ukrayna ətrafında yaranmış mövcud vəziyyətin dövlət çevrilişi ilə başladığını bildirib.
Bu barədə Crossmedia.az xarici KİV-ə istinadən xəbər verir.
Putinin sözlərinə görə, Kiyev ərazi güzəştlərinə hazır olduğunu nümayiş etdirmir. O qeyd edib ki, 2022-ci ildə Donbasda hərbi əməliyyatların başlanmasından sonra Rusiya Luqansk və Donetsk Xalq Respublikalarını tanımağa məcbur qalıb.
Rusiya prezidenti iddia edib ki, Ukrayna Silahlı Qüvvələrinin Kursk vilayətindən sıxışdırılıb çıxarılmasından sonra strateji təşəbbüs tam şəkildə Rusiya Silahlı Qüvvələrinin nəzarətinə keçib.
Putin bildirib ki, hazırda Krasnı Limanın təxminən 50 faizi Rusiya qoşunlarının nəzarəti altındadır və şəhərin yaxın vaxtlarda tam ələ keçiriləcəyi gözlənilir.
Onun sözlərinə görə, döyüşlər Qulyaypole şəhərində də davam edir və burada Rusiya Silahlı Qüvvələri şəhərin təxminən yarısına nəzarət edir. Putin eyni zamanda Konstantinovkanın da yaxın zamanda Rusiya qoşunları tərəfindən ələ keçiriləcəyinə şübhə olmadığını vurğulayıb.
Türkanə Məşədiyeva
14:31 19.12.2025
Oxunuş sayı: 1040
