Papuashvili: Ukrayna münaqişəsində uduzan tərəflər Ukrayna və Avropa İttifaqıdır
Ukraynadakı hərbi münaqişədə uduzan tərəflərin Ukrayna və Avropa İttifaqı olacağını Gürcüstan parlamentinin sədri Şalva Papuashvili bəyan edib. Gürcüstan KİV-lərinin məlumatına görə, o, bu fikirləri jurnalistlərə açıqlamasında səsləndirib.
Crossmedia.az xəbər verir ki,Papuashvili bildirib ki, müharibədə qalibin olub-olmayacağını demək hələ tezdir, lakin artıq iki tərəfin ciddi itkilərə məruz qaldığı aydındır. Onun sözlərinə görə, Ukrayna faktiki olaraq ərazilərinin bir hissəsinin itirilməsi ilə bağlı qərarlar qəbul etməyə məcbur qalıb, son dörd il ərzində yüz minlərlə vətəndaşını itirib, ölkə iqtisadiyyatı isə ciddi zərər görüb.
Spiker Avropa İttifaqını da münaqişənin uduzan tərəfi kimi qiymətləndirib. O qeyd edib ki, Ukraynaya maliyyə və hərbi yardımın əsas yükü Aİ-nin üzərinə düşüb. Papuashvilinin sözlərinə görə, Avropa İttifaqı kreditlər cəlb edir və bu vəsaitlər hesabına Ukraynaya borc verir.
Bununla yanaşı, o vurğulayıb ki, Aİ-də iqtisadi artım demək olar ki, sıfır səviyyəsindədir və ittifaq daxilində daxili siyasi gərginlik getdikcə artır. Spikerin fikrincə, bütün bunlar Avropa İttifaqının mövcud vəziyyətini daha da çətinləşdirir.
Nastya Qəniyeva
13:14 19.12.2025
Oxunuş sayı: 1031
